*Qazaqstandyq salymshylardyń taza ınvestısııalyq kirisi ótken jyldyń 11 aıynda 188,7 mlrd. teńgeni qurady. Ulttyq banktiń sońǵy deregine kóz júgirtsek, 2014 jyldyń 1 jeltoqsanyndaǵy jaǵdaı boıynsha, zeınetaqy jınaqtary 4,4 trln. teńgeden asqan. Al onyń ósimi – 700 mlrd. teńge.
*Elimizdiń óńirlerinde 40 medısınalyq-qutqarý pýnkti qyzmet kórsetip keledi. Tótenshe jaǵdaılar komıteti habarlaǵandaı, «Salamatty Qazaqstan» baǵdarlamasy aıasynda qurylǵan bul jol boıy pýnktteri búginge deıin 7 myńnan astam adamǵa der kezinde kómek kórsetken.
*Almaty oblysynda sabannan otyn kespekterin daıyndaıtyn zaýyt ashyldy. Kóksý aýylyndaǵy bul shaǵyn kásiporyndy iske qosqan kásipker Serik Abyhanovtyń aıtýynsha, onyń qýattylyǵy táýligine 20 tonna bıootyn shyǵarýǵa jetedi. Zaýytqa 70 mln. teńgege satyp alynǵan jabdyqtar Baltyq boıy elderinen ákelinipti. Qazirdiń ózinde aýdannyń 12 mektebi osy bıootyndy qoldana bastaǵan.
*Astanada 95 myńnan astam adamǵa áleýmettik qoldaý kórsetildi. Qalalyq jumyspen qamtý jáne áleýmettik baǵdarlamalar basqarmasy málim etkendeı, muqtaj azamattardyń jekelegen sanattaryna tegin qyzmetter túrinde jáne 2 222,1 mln. teńge kóleminde áleýmettik kómekter berilgen.
*Shymkentte «Intellektýaldy qıylys» júıesi qurylady. Ońtústik Qazaqstan oblystyq IID ákimshilik polısııa basqarmasy basshysynyń orynbasary Almas Tastanbekov atap kórsetkendeı, bul júıe jol erejesin buzǵandarmen qatar, kólik urlaǵandardy da jyldam anyqtaýǵa múmkindik beredi.
*Qyzylorda óńirinde byltyr 286,3 myń sharshy metr turǵyn úı paıdalanýǵa berilgen. Oblystyq ekonomıka jáne bıýdjettik josparlaý basqarmasynyń basshysy Sáýle Qulymbetovanyń sózine qaraǵanda, aımaqta jumyssyzdyq deńgeıi 5,0 paıyzdy qurap, 2013 jyldyń sáıkes kezeńimen salystyrǵanda 0,2 paıyzǵa azaıǵan. Al negizgi kapıtalǵa salynǵan ınvestısııalar kólemi 253,3 mlrd. teńgege jetip otyr.
*Qostanaılyq aýyl sharýashylyǵy taýaryn óndirýshiler 2014 jyly 107 mlrd. teńgeniń ónimin shyǵardy. Oblys ákiminiń orynbasary Bazyl Jaqypov óńirde shujyq, kúnbaǵys maıyn jáne et, sút ónimderin óndirý isinde ilgerileýshilik baıqalǵanyn, sondaı-aq, agroónerkásiptik keshende 33 jańa ınvestısııalyq jobanyń iske qosylǵanyn jetkizdi.
*Soltústik Qazaqstanda deneshynyqtyrý-saýyqtyrý kesheni qatarǵa qosyldy. Ǵ.Músirepov atyndaǵy aýdannyń ortalyǵy – Novoıshım aýylynda boı kótergen nysandy salýǵa 260 mln. teńge jumsalǵan. Aýdan ákimi Vladımır Dýdov keshenniń ashylý rásiminde onda basketbol, voleıbol, kúres, boks, jeńil atletıka seksııalary, trenajer zaly jumys isteıtinin málimdedi.
*Batys Qazaqstannyń Zelenyı aýylyna gaz jetkizildi. Gaz qubyrynyń atalǵan aýylǵa deıingi jalpy uzyndyǵy – 5 shaqyrym. Jobany júzege asyrýǵa bıýdjetten 18 mln. teńge bólingen. Aıta keteıik, qazirgi tańda oblystyń eldi mekenderin gazdandyrýǵa barlyǵy 3 mlrd. teńgege jýyq qarjy jumsalypty.
Habarlar Úkimet, oblystyq ákimdikter saıttary men «QazAqparat» agenttiginiń derekteri boıynsha daıyndaldy.