El azamattary Reseı túrmelerinde jazasyn ótep jatqan týystaryna alańdap Bas prokýratýraǵa jıi júgine bastaǵan. Olar kórshi el túrmesinde soǵysqa úgitteý sharalary ótkizilip jatqanyn aıtyp, jaqyndaryn Qazaqstanǵa aýystyrýdy suraǵan. QR Syrtqy ister mınıstriniń resmı ókili Aımek Smadııar bul máselege qatysty málimdeme jasady, dep jazady Egemen.kz.
Búgin OKQ alańynda ótken aptalyq brıfıngte Aıbek Smadııar mundaı faktilerdiń sany onǵa jetpeıtinin aıtty. Sondaı-aq kórshi memlekette jazasyn ótep jatqandardyń basym bóligi nashaqorlyq baby boıynsha aıyptalǵan.
Zań boıynsha azamattar qaı elde júrip tártip buzsa, sol eldiń zańyna saı jazalanýy kerek.
«Bul azamattar zańsyz jumysty Telegram-arnalardan nemese áleýmettik jeliden tapqan. Olar qaıda baratynyn, qandaı ispen aınalysý kerek ekenin bildi. Bizdiń konsýldar olarmen baılanys ornatqan, birneshe ret kezdesý ótkizgen. Reseı túrmesinde otyrǵan Qazaqstannyń bir de bir azamaty soǵysqa attanǵan joq. Muny 100 paıyz rastaı alamyz. Adam qaı elde zań buzsa, sol eldiń zańymen jaýap berýi kerek. Jaza belgilenip, túrmege aýysqan soń prokýratýra iske kirisip, bizdiń elde jazasyn óteýge ǵana aýystyra alady. Bizdiń sotpen olardy sottaı almaımyz. Áleýmettik jelilerde jumys usynyp jatsa, muqııat tekserip, qaýipsizdik sharalaryn esten shyǵarmaýǵa shaqyramyz», dep jaýap berdi Aıbek Smadııarov .