QOSTANAI. 9 qańtar. Qostanaı oblystyq qylmystyq ister jónindegi mamandandyrylǵan sotta jeti jasar Vıktorııa Ganıanyń ólimine baılanysty qylmystyq isti aldyn ala tyńdaý ótti. Bul týraly ng.kz habarlady.
60 tomnan turatyn istiń alǵashqy tyńdaýy jabyq jaǵdaıda ótti. Rýdnyı qalasyndaǵy 7 jasar Vıka Ganıany zorlap, odan keıin óltirgen Denıs Lesıkovty sot zalyna kúsheıtilgen kúzetpen alyp kirdi. Onyń jasy 31-de, aqyl-esi durys, Qostanaı qalasynyń turǵyny. Ádette, sottalýshynyń isti alqa bılerdiń qatysýymen júrgizýdi suraýǵa múmkindigi bar. Biraq Lesnıkov ony suraǵan joq. Qylmystyq is sýdıa Erlik Seralınniń tóraǵalyq etýimen júrgiziledi. Sottyń alǵashqy májilisi 26 qańtarǵa belgilendi.
Eske sala ketsek, 2014 jyly 24 sáýirde Rýdnyı qalasyndaǵy 7 jasar Vıktorııa Ganıa iz-túzsiz joǵalyp, bir aıdan keıin onyń máıiti tabylǵan bolatyn. Búldirshin qyzdyń joǵalýy búkil oblys halqyn abyrjytty. Ony izdeýge myńdaǵan volonterler, polıseıler, turǵyndar, tótenshe jaǵdaı departamenti qyzmetkerleri men áskerıler qatysty. Búkil eldi shýlatqan bul qylmysqa qatysty qostanaılyq polıseılerdiń kásibı biliktiligine syn aıtylǵany belgili. Qyz balanyń máıitin volonter Vladımır Radchenko taýyp alǵan bolatyn. Medısınalyq saraptaýdan keıin Vıkanyń basyna tıgen soqqydan qaza bolǵany anyqtaldy. Búldirshindi óltirgen qylmysker osy kúnge deıin izin jasyryp keldi. Ony izdeý barysynda 19 jasar múgedek Vladımır Pyjov ustalǵan bolatyn. Oblystyq prokýratýranyń málimetinshe, múgedek jigittiń bul oqıǵaǵa qatysy bolmaı shyqty.
Aıyptalýshy Denıs Lesıkovqa tórt ret adam óltirdi, eki ret jasóspirimderdi zorlady degen aıyp taǵylyp otyr. Ol jasóspirim Qymbat Muqatovany, Qostanaı qalasynyń turǵyndary Ábdildına men Polıanıchkony óltirgen. Muqatova men Polıanıchko iz-túzsiz joǵalyp ketken, Ábdildınanyń isi ashylmaǵan. Azǵynnyń sońǵy qurbany Rýdnyı qalasyndaǵy 7 jasar Vıktorııa Ganıa bolypty. Denıs Lesıkovty kýálardyń barlyǵy da tanymaǵan, biraq DNK onyń qylmysqa qatystylyǵyn bultartpaı otyr.
Názıra Járimbetova.
Derek, sýret: ng.kz.