Hakim Abaıdyń bul sózi eshqashan kónermeıdi. Búgingideı ǵylym men tehnıka meılinshe órkendegen tusta, jurtshylyq bar keregin ǵalamtordan izdep, kompıýter kitapty yǵystyryp shyǵarady deıtin pikirlerdiń kórigi qyzyp jatqan kezde oǵan bir túrli kúmándanyp qalatynyń da qupııa emes. Desek te, adamzatty búgingideı damyp-órkendegen zamanǵa jetýine kitaptyń da úlesi bolǵanyn eshkim joqqa shyǵara almas.
«Jas balany saıası qaıratkerge deıin tárbıeleıtin – kórkem ádebıet», depti L.Feıhtvanger. Endeshe, balanyń kitap oqymaı qoıǵanyna alańdamaı tura almasaq kerek.
Balany ǵana emes, jalpy jurtshylyqty kitap oqýǵa qulshyndyrý úshin ne isteý kerek? Bul – Shymkent qalasy hımııa-bıologııa baǵytyndaǵy Nazarbaev zııatkerlik mektebiniń ustazdary men oqýshylarynyń kókeıindegi suraq edi.
Kóp uzamaı bilim ordasynyń ákimshiligi bul baǵytta ózindik ádis-tásilderdi qoldanýǵa kiristi. Sonyń biri – mektepte uıymdastyrylǵan oqý saǵaty. Oqý saǵaty aptasyna eki kún ótkiziledi. Aptanyń seısenbi jáne beısenbi kúnderi úlken úzilis kezinde mekteptiń búkil muǵalimder ujymy, oqýshylary men tehnıkalyq qyzmetkerleri jappaı kórkem ádebıet oqýmen aınalysady. Bul úderistiń júzege asý barysy arnaıy qadaǵalanady, beınetaspaǵa túsiriledi. Al apta qorytyndysynda oqý saǵatyna taldaý jasalyp, kemshilikter men usynystar aıtylady.
«Keńesip pishken ton kelte bolmas». Igilikti ıdeıa iske asyrylýdan buryn jeti ret ólshengen. Ásirese, ýaqyt tıimdiligin qamtamasyz etý ádepkide ájeptáýir suraq týyndatty. Ras, aýqymdy shyǵarmany oqyp-aıaqtaý úshin kemi 3-4 kún qajet delik. Bas-aıaǵy bir saǵatqa jeter-jetpes úziliste ony qalaı oqýǵa bolady?
Mektep ujymy oqıtyn kitabyn únemi ózimen birge alyp júrýge mindetteme aldy. Olar oqý saǵaty bastalǵan ýaqytta barlyq jumysty ysyryp qoıyp, jappaı kitap oqýǵa kirisedi. Bul ýaqyttyń ishinde shaǵyn janrdaǵy birneshe poezııalyq, prozalyq týyndylardy oqyp aıaqtaýǵa bolatyny belgili boldy. Eń bastysy, ákimshilik-basqarý qyzmetkerlerinen bastap, muǵalimder men tehnıkalyq qyzmetkerler, oqýshylar oqý saǵatyna belsendi qatysýǵa daǵdylandy.
Kitaphana qyzmetkerleriniń aıtýynsha, oqý saǵaty engizilgennen bergi ýaqytta mektep kitaphanasyna kelýshiler kúrt kóbeıip, álemdik klassıka men qazaq ádebıeti oqyrmandarynyń sany arta tústi. Sórelerde syqıyp turatyn qalyń kitaptar oqýshylaryn taýyp, kitaphanalyq qordyń kúndelikti aınalymy artty. Munyń ózi ońtaıly istiń oń nátıje bere bastaǵanyn kórsetti. Endigi mindet – oqý saǵatyn uıymdastyrý tıimdiligin arttyrý, oqý ýaqytyn kóbeıtý.
Ábdimanap TASBOLAT,
hımııa-bıologııa baǵytyndaǵy
Nazarbaev zııatkerlik mektebiniń qazaq tili men ádebıeti muǵalimi.
ShYMKENT.