ASTANA. 11 qańtar. Keshe, 10 qańtarda Fransııanyń kóptegen qalalarynda myńdaǵan adamdardyń qatysýymen sherýler bolyp ótti. Jurt osylaısha Parıjde aıdyń alǵashqy onkúndiginde oryn alǵan teraktilerde qaza tapqandardy eske túsirdi. Bul týraly ras.kz habarlady.
«Bostandyqty qoldaý men terrorǵa qarsy marsh bul kúni Po, Orlean, Týlýza, Nant, Nıssa sekildi qalalardy qamtydy. Kóshege sherýge shyqqandardyń jalpy sany 700 myń adamǵa jýyqtady.
Al eske túsirý men yntymaqtystyqty bildiretin negizgi aksııa búgin, 11 qańtar kúni óris aldy. Oǵan Eýropa odaǵy men jekelegen elderdiń lıderleri qatysty. Solardyń qatarynda Germanııa kansleri Angela Merkel, Italııa premer-mınıstri Matteo Rensı, Ispanııa úkimetiniń basshysy Marıano Rahoı, Eýropa keńesiniń prezıdenti Donald Týsk, Ulybrıtanııa premer-mınıstri Devıd Kemeron, Eýroodaq dıplomatııasynyń basshysy Federıka Mogerını, Eýroparlament tóraǵasy Martın Shýls boldy. Ýkraına jaǵynan prezıdent Petr Poroshenko keldi.
Teraktilerdiń basy 7 qańtar kúni Parıjdegi Charlie Hebdo satıralyq jýrnalynyń redaksııasyna eki adamnyń shabýyl jasap, Kalashnıkov avtomatynan oq jaýdyrýynan bastaldy. Osy lańkestiktiń nátıjesinde redaksııanyń 10 qyzmetkeri jáne 2 polıseı qaza tapty. Taǵy 11 adam jaraqat aldy. Keıinirek taǵy birqatar nysandarda jarylystar bolyp, sońy atysqa ulasty. Kúsh qurylymdarymen qaqtyǵysta lańkesterdiń bári óltirildi.
Aıdar О́risbaev.
Derek: ras.kz.
Sýret: ipress.ua.