Qasıetti Atyraý topyraǵynda ótip, halyq pen bıliktiń arasynda kópir bola bilgen Ulttyq quryltaı shynynda da eldiń birligi men yntymaǵyn dáripteıtin, soǵan qyzmet jasaıtyn shynaıy platformaǵa aınaldy.
Aýqymdy jáne maǵynaly jıynnyń aldynda ár baǵytta birneshe seksııalyq otyrystar ótkizilip, Quryltaı músheleriniń túrli taqyryptaǵy pikirleri tyńdaldy. Adamnyń quqyqtaryn qorǵaý, otbasylyq zorlyq-zombylyqtarǵa tosqaýyl qoıý, máslıhattardyń rólin arttyrý, jergilikti qoǵamdyq keńesterdi naǵyz halyqtyń ókildi organdaryna aınaldyrý týraly naqty pikirler aıtyldy. Memleket basshysy Qasym-Jomart Toqaev Quryltaıda kópshilik kútkendeı elimizdiń bolashaǵy, táýelsizdigimizdiń baıandylyǵy jolynda jasalýǵa tıis birshama bastamany atap ótti.
Dinimizge, tilimizge qatysty biraz másele ashyq aıtyldy. Ata-babalarymyzdyń tarıhymen birge jalǵasyp kele jatqan dinimizden aınymaı mázhabymyzdyń maqsatyn buzbaı, ulttyq naqyshtarymyzǵa laıyq kıim úlgisinen taımaı ıslam dininiń talaptaryna berik bolýǵa bolatyndyǵyn jetkizdi. Shyndyǵynda da ár adamnyń ımany – júregi men tileginde. Sonymen birge myńdaǵan jyldar boıy halqymyzdyń dástúrimen birge jasap kele jatqan súnnıttik Hanafı mázhabyn ustanýdan taımaý kerektigin aıtqan Prezıdent sopylyq ilimmen birge qazirgi Qazaq eline ıslamdy taratyp, ornyqtyrǵan Iаsaýı babamyzdyń rýhanı qundylyqtaryn dáripteýdiń tarıhı máni zor ekendigin, onyń kesenesine álemge áıgili jádiger retinde erekshe kóńil bólý kerektigin, tipti jatqan jerindegi kók tastyń jabýyn ıslam órkenıetine laıyq etip, qaıta jasap shyǵý týraly tapsyrmasy eldi eleń etkizetin jańalyq boldy dep esepteımiz.
Al qazaq tili qazirgi zamanǵa laıyq ekonomıka, óndiris, tehnıka men tehnologııa tiline aınalýǵa barynsha múmkindigi bar ekendigin de Prezıdent naqty aıtty. «Tilimizdiń qoldaný aıasyn keńeıte túsý memlekettik saıasattyń basty baǵyty bolyp qala beredi. Bul – biz úshin myzǵymas ustanym. Elimizde qazaq tiline degen suranys jyl ótken saıyn artyp keledi. Qazaq tili bıznestiń, ǵylym men tehnıkanyń tiline aınala bastady. Bul úrdisti odan ári damytýdyń eń tıimdi ári tóte joly – aǵartýshylyq. Qazir iri kitap dúkenderinde qazaq tilindegi týyndylardyń úlesi arta tústi. Sońǵy kezde baspagerlerdiń jańa býyny álemdik bestsellerge aınalǵan shyǵarmalardy aýdaryp júr. Kóptegen kitapty shyǵaryp jatyr», dep atap kórsetti.
Memleket basshysynyń bastamalarynyń arasynan bizdiń halqymyz, ásirese jastarymyz úshin bes jaman ádetten qutylyp, alty qundylyqqa umtylý qajettigi týraly aıtqan baǵdarlamalyq sózderin erekshe atap ótkim keledi. Úkimet pen memlekettik organdarǵa ózderiniń jumystaryn da, baǵdarlamalardy da osyǵan sáıkestendirý týraly tapsyrmalar da berdi.
Prezıdent atap ótken 5 jaman ádetti aıtar bolsaq, olar – nashaqorlyq, lýdomanııa, turmystyq zorlyq-zombylyq, vandalızm, ysyrapshyldyq. Al 6 ulttyq qundylyq retinde táýelsizdik pen otanshyldyqty, birlik pen yntymaqty, ádildik pen jaýapkershilikti, zań jáne tártipti, eńbekqorlyq pen kásibı biliktilikti jáne jasampazdyq pen jańashyldyqty aıtty.
Osy qaǵıdalardyń barlyǵy Prezıdentimizdiń ózi kóterip júrgen «Adal adam» formýlasynyń qaǵıdattaryna tolyq sáıkes keledi, ádiletti Qazaqstan qurýdyń negizin qalaıdy.
Álı BEKTAEV,
Senat depýtaty