Halyqtyń kóshi-qony men qylmystyq atqarý júıesi salalaryndaǵy ózekti máselelerdi retteýge arnalǵan jańa zańnyń kóterer júgi aýyr, maqsaty salmaqty.
Kóshi-qonǵa qatysty zań jobasyn talqylaǵan kezde jumys tobynda men de boldym. Bir top depýtat sheteldegi qandastarymyzdyń elge kelýi úshin olardyń óz sharýa qojalyqtaryna arnaıy konkýrstan tys jer telimin berý týraly bastamany kóterdik. Jańa norma shettegi qandastarymyzdyń elge oralýyna yqpal etetin tıimdi sheshim bolǵany ras.
Ekinshiden, zańda memlekettik tildiń mártebesine qatysty qabyldanǵan talap bar. Budan bylaı elimizge azamattyq alýǵa kelgen ár adamǵa qazaq tilin A1, ıaǵnı bazalyq deńgeıde bilý talaby qoıylady. Bul – álemniń kóptegen elinde bar tájirıbe. Sonymen qatar olardan Ata zańymyzdyń negizderine jáne Qazaqstan tarıhyna qatysty 25 suraqtan turatyn test alynady. Soǵan durys jaýap bergen jáne memlekettik tilimizdi bazalyq deńgeıde bilgen sheteldikke azamattyq berý máselesi qaralmaq.
Qujat – memlekettik tildiń mártebesin kóteretin zań. Prezıdent Qasym-Jomart Toqaev qazaq tiliniń ultaralyq qatynas tili bolýyna kóńil bólip keledi. Qabyldanyp otyrǵan zań talaptary da osy baǵytta qolǵa alynǵan oryndy bastama. Sońǵy sanaqqa kóz júgirtsek, elimizde turatyn halyqtyń 70 paıyzy – qazaq ulty bolsa, ár deńgeıde memlekettik tildi biletinder qatary 92–93 paıyzdy quraıdy. Endeshe, syrttan keletin sheteldikter qazaq tilin bilse, bul olardyń osy qoǵamnan óz ornyn tabýyna septigin tıgizbek.
Bolat KERIMBEK,
Májilis depýtaty