Keshe Ortalyq kommýnıkasııalar qyzmetinde «Jasyl» ekonomıka úshin jáne G-Global-dy damytý koalısııasy» ZTB atqarýshy dırektory Ashat Súleımenov brıfıng ótkizdi. Onda koalısııanyń atqaryp jatqan jumystary sóz boldy.
Spıkerdiń sózine qaraǵanda, bıylǵy jyly Astanaǵa irgeles Arshaly aýdanyna qarasty Arnasaı aýylynda «Arnasaı – jasyl alqap» jobasy júzege asyrylady eken. Atalǵan alqapta elimizdegi eń úzdik ári tıimdi, oǵan qosa qoljetimdi jasyl tehnologııalar shoǵyrlandyrylyp, jınaqtalatyn kórinedi. «Búginde jasyl tehnologııalar shaǵyn jáne orta bıznestiń básekege qabilettiligin arttyrýǵa múmkindik beredi. Sondaı-aq, elimizde Birikken Ulttar Uıymynyń Damý baǵdarlamasy birneshe jyldan beri jumys istep keledi. Osy kúnge deıin olar Mańǵystaý, Qyzylorda, Shyǵys Qazaqstan, Aqmola oblystarynda áleýmettik nysandarda birtalaı jasyl jobalardy júzege asyrdy», dedi A.Súleımenov.
Koalısııa dırektorynyń sózine qaraǵanda, endi osynaý ozyq jobalardy birtindep bızneske endirý jumystary júrgizilip jatyr. «Osy suraqtar tóńireginde jaqynda Birikken Ulttar Uıymynyń Damý baǵdarlamasynyń basshylarymen kezdestik. Sóıtip, elordadan 35 shaqyrym jerde Arnasaı demoalańyn qurýǵa kelistik. Osy jerde jasyl tehnologııalardyń eń úzdikteri jınaqtalady dep kútilýde», dep sózin jalǵady ol.
Brıfıngte aıtylǵan taǵy bir jańalyq, bıyldan bastap elimizde jasyl tehnologııalarǵa negizdelgen qazirgi zamanǵy jylyjaılar qurylysy bastalady eken. «Qazaqstanda «Jasyl kópir» seriktestik baǵdarlamasy iske asyrylýda, ol jasyl tehnologııalardy transfertteýdi qarastyrady. Osy baǵdarlama boıynsha koalısııa búginde reseılik áriptesterimen birlesip, eki tehnologııany endirdi. Aýyl sharýashylyǵy salasynda jańa tehnologııa júzege asyrylýda. Sondaı-aq, buryn-sońdy elimizde bolmaǵan kún bıo-vegetarıı qurylysy qolǵa alynady. Bul – aýmaǵy 1200 sharshy metrdi quraıtyn qazirgi zamanǵy jylyjaı», dedi A.Súleımenov.
Atqarýshy dırektor jýrnalısterdiń kókeıinde júrgen birqatar suraqtarǵa da jaýap berdi. «Jasyl» ekonomıkanyń elimizde barynsha damytylyp jatqanyn nazarǵa alyp, Astanada ótetin EKSPO-2017 kórmesi jóninde de áńgimeledi. Aıtýly sharaǵa elimizdiń ǵalymdary aıryqsha daıyndalyp jatqanyn aıtyp, otandyq ónertapqyshtardyń eńbegine toqtaldy. «Otandyq árbir rasıonalızator ózi oılap tapqan dúnıesin patentteýge óte uqypty bolýy tıis. Ony zańdastyryp alǵan soń sheteldik nemese otandyq kompanııalarǵa satýdy menshik ıesi ózi sheshedi. Osy oraıda aıta keterligi, ónertapqyshtardyń ekonomıkaǵa, ekologııaǵa tıimdi jańa zattaryn óz elimizde óndirýge otandyq kompanııalar da yntaly ekenin aıtqym keledi», dedi ol.
Koalısııanyń baspasóz qyzmeti taratqan aqparattaǵy derekke qaraǵanda, 2015 jyly «Jasyl» ekonomıka úshin jáne G-Global-dy damytý koalısııasy birneshe qonaq kútý úılerin salýdy, ǵımarattar men taýarlarǵa ekomarkırovka jasaýdy qolǵa alýdy kózdep otyrǵan kórinedi.
Nurbaı ELMURATOV,
«Egemen Qazaqstan».