«Elý jylda el jańa» deıdi halqymyz. Osydan 74 jyl burynǵy soıqan soǵystyń zardaby joıylyp, zamanymyz jańardy, urpaq aýysty, orta tolyp, kóńil bútindeldi. Ol jaqsy kúnniń saǵaty soqqanyna bıyl – 70 jyl. Biraq, júrekten jara jazylsa da, jadydan jańǵyryq joǵalǵan joq. «Eshqashan soǵys bolmasyn!» deıtin beıbitshiliksúıgish halqymyz sol bir surapyldyń ortasynan aman-esen oralǵan ardagerlerdi qurmet tutýmen qatar, olardyń órshil, erjúrek rýhyn úlgi-ónege tutady.
Ardagerlerdi ardaqtap, jastardy jigerlilikke shaqyratyn «Jeńiske –qurmet» marafony Mańǵystaý oblysynda jalǵasyn tapty. Tolqyny tynymsyz alasurǵan Kaspıı teńiziniń jaǵalaýyndaǵy alańǵa jeńis qýanyshyna ún qosqan urpaq jıyldy. Olardyń arasynda áskerı qyzmetkerler, jas sarbazdar, qala turǵyndary men bılik ókilderi bar.
– Halqymyzdyń erjúrek ulandary qan maıdanda erlikpen soǵysty. Ortaq jeńiske laıyqty úles qosty. Júzdegen qaharman jaýyngerlerimiz óz esimderin tarıhqa óshpesteı jazyp ketti. Olardyń ishinde mańǵystaýlyq batyrlardy biz maqtanyshpen ataımyz. Búgingi ıgi sharanyń basty sebebi – «Jeńiske – qurmet» aksııasy aıasynda barsha ardagerlerge qurmet kórsetý, ulyqtaý, erlikterin jastarǵa jetkizý, – dedi áskerı-patrıottyq sharada sóz alǵan Mańǵystaý oblysy ákiminiń orynbasary Á.Shójeǵulov.
Alańda sap túzegen áskerılerdiń, qylshyldaǵan jas jaýyngerlerdiń ótkenniń ónegesin jalǵap, búginniń tynyshtyǵyn saqtap turǵan eren kúsh – táýelsiz Qazaqstannyń qalqany ekenin sezinesiń. Sharada Uly Otan soǵysynyń ardageri Bısen Boqaev azat elimizdiń búginine táýbe aıtyp, erteńine senimin bildirdi, sondaı-aq, bereke-birlikke uıyǵan beıbit ómir besiginde Otan aldyndaǵy boryshyn ótep júrgen jas sarbazdarǵa sáttilik tiledi. О́ńirdegi №390 teńiz jaıaý áskeriniń komandıri, Ulttyq ulan podpolkovnıgi E.Tolyqpaev ekinshi dúnıejúzilik soǵys atanǵan alapatta taısalmaǵan bozdaqtardyń rýhyna taǵzym etý, olardyń erlik dástúrin úlgi tutý qasıetti borysh ekendigin aıtyp, ardagerlerge alǵysqa toly lebizin bildirdi.
Zamandaryna tap kelip, bastaryna túsken zobalańdy qaıyspaı kóterip, ony erge tán qaısarlyqpen jeńip shyqqan býyn ókili – maıdanger Bısen aqsaqal urpaq sabaqtastyǵyn úzbeý, erjúrek jaýyngerlerdiń erlik isi men óreli izin jalǵaý maqsatynda ardagerler atynan Aqtaý qalasy Áskerı-teńiz ınstıtýtynyń túlegi, aǵa leıtenant M.Baımuhanovqa «Jeńiske – qurmet» jalaýshasyn tabystady.
Áskerı sharada áserli áýendi quıqyljytyp, áskerı tártippen kelisti bı yrǵaqtaryna tánti etken Ishki ister mınıstrligi №6656 áskerı bóliminiń Ulttyq ulan orkestri áskerı áýen áýeletip, teńiz jaıaý áskeri brıgadasynyń barlaý rotasy áskerı oqý-jattyǵý qoıylymdaryn kórsetti. Alańda Aqtaý garnızony bastyǵynyń buıryǵymen 2000-ǵa jýyq áskerı saltanatty sap túzedi. Qazaqstannyń shyǵys, soltústik, ońtústik aımaqtary arqyly Mańǵystaýǵa jetken aksııa osylaısha sherý tartyp, Almatyǵa qaraı attandy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
Sýretti túsirgen
Talant QUSAIYN.