Aýyl jigitteriniń qoly bos. Qyzyl sý tyıylyp, jer qaraıǵan soń taqymdaryna basqan qylquıryqtylaryn jarata bastaıdy. Burynǵydaı emes, el ishinde báıge kóp. Kóńil aýlaıtyn bir qyzyq osy.
At ustaǵannyń kez kelgeni Tolybaı synshy ispetti. Aldyna kóldeneń tartqan jylqy balasynyń bar bitimin túgendep, qaýqaryn tarazyǵa tartqandaı aıtyp beredi. Yrym etkeni qyryn ketip jatsa da, júzderi jyǵylmaıdy-aý.
Alqaqotan otyrǵanbyz. Áset óziniń bestisin maqtaı jóneldi. Jaı jel sóz emes, naqty mysalmen kómkerilgen oqıǵa.
– Qys ishi bolatyn, – deıdi Áset. – besin aýa bestimdi aýyl qotanyndaǵy qudyqtan sýaraıyn dep bara qalmaımyn ba, aýyl shetinen «qasqyr, qasqyr!» degen daýys shyqty.
Ásetpen kójetamyrlyǵy bar Esenbaı qostaı jóneldi.
– Bıyl, – deıdi ol, – jeltoqsannyń sońynda qaraqurym elik aýyp keldi emes pe? Biletinderdiń aıtýlaryna qaraǵanda, Sibirdiń eligi tárizdi. Bizdiń jerdegi, kóz kórip júrgen elikteı emes, turqy sál kishkentaı. О́zimizdiki ekeý-úsheýden júrse, aýyp kelgen elik júzdep, úıirimen kezdesetin. Ash qasqyr Túmenniń qalyń ormanynan aýǵan elikpen birge kelýi ábden yqtımal.
Qostaýshy tabylǵan soń Áset áńgimeniń tıegin aǵytty. Aıtýyna qaraǵanda, erttep shyǵýǵa ýaqyt bolmaı, bestisine jaıdaq minip, kelimsek qasqyrdy qýyp berse eken.
– Qozykósh jerge uzatpaı qýyp jettim, – deıdi Áset. – suly jep, erigip turǵan besti bóriniń ústine minip kete jazdady. Ataıyn desem ıyǵymda myltyǵym joq. Asyǵyp júrip qabyrǵada súıeýli turǵan qaıyń soıylymdy da almappyn. Jalma-jan úzeńgini aǵytyp alyp, qasqyrdy qara tumsyqtan perdim-aı kelip.
О́zi de at ekpinimen lyqsyǵandaı teńselip ketti. Oń qolyn ántek kóterip, quddy úzeńgisin siltegendeı soza bergende, janynda otyrǵan Qurman bileginen ustaı alyp: – «Áı, sen mana jaıdaq shyǵyp ediń ǵoı», – dedi.
Qyzyq áńgimeniń qyrtysy osy jerde jazylmaı qalǵany. Ańshylar da aıta beredi-aý.
Kókshetaý qalasy