ASTANA. 15 qańtar. Bas prokýror Ashat Daýylbaev kezekti ret azamattardy jeke qabyldady. Aryz berýshilerdiń ótinishteri negizinen qylmystyq jáne ákimshilik ister boıynsha sot aktilerine, qylmystyq is júrgizýdiń sotqa deıingi satysyndaǵy ýákiletti organdardyń sheshimderine, sondaı-aq áleýmettik-ekonomıkalyq saladaǵy shaǵymdarǵa qatysty boldy. Bul týraly Bas prokýratýranyń baspasóz qyzmeti habarlady.
Bas prokýror kelgen azamattardy tyńdaǵan soń, shaǵymdardy muqııat zerdelep, zań buzýshylyq anyqtalǵan jaǵdaıda buzylǵan quqyqtardy qalpyna keltirý jáne kináli tulǵalardy zańmen belgilengen jaýapkershilikke tartý boıynsha túbegeıli sharalar qabyldaýdy tapsyrdy.
Ashat Daýylbaevtyń osyǵan deıingi qabyldaýynda bolǵan aryzdanýshylardyń dáıekterin tekserý úshin Bas prokýratýra qylmystyq qýdalaý organdary qaýlylarynyń kúshin joıyp, sotqa deıingi tergeý qozǵady.
V.Aıtkojınanyń ótinishin qaraý nátıjesi boıynsha ózinshe bılik etý faktisi boıynsha qylmystyq isti qozǵaýdan bas tartý týraly qaýlynyń kúshi joıyldy, is júrgizýshilik sheshim qabyldana otyryp sotqa deıingi tergeý taǵaıyndaldy. Almaty qalasynyń prokýroryna tergeýge deıingi tekseris júrgizý kezinde zańdylyqtyń buzylýyna jol bergen, sondaı-aq tıisti qadaǵalaýdy qamtamasyz etpegen kináli tulǵalarǵa qatysty sharalar qabyldaý týraly tapsyrma berildi.
K.Ámirenovtiń shaǵymy boıynsha denege zaqym keltirý faktisi boıynsha qylmystyq is qozǵaýdan bas tartý týraly Aqmola oblysynyń Bulandy aýdandyq IIB sheshiminiń kúshi joıyldy, sotqa deıingi tergeý bastaldy.
Aryzdanýshy J.Báımenovtiń dáıekterin zerdeleý nátıjesimen Almaty garnızony boıynsha UQK Áskerı polısııa basqarmasynyń laýazymdy tulǵalaryna qatysty qylmystyq isti qysqartý týraly qaýlynyń kúshi joıyldy. Sotqa deıingi tergeý júrgizý úshin qylmystyq is IIM Tergeý komıtetiniń áskerı-tergeý basqarmasyna joldandy.
Joldybaı Bazar.
Derek, sýret: Bas prokýratýranyń baspasóz qyzmeti.