ASTANA. 16 qańtar. Qyzylorda oblysy boıynsha kásipkerler palatasy men Qyzylorda oblysy boıynsha memlekettik kirister departamenti ekonomıkalyq tergeý qyzmetiniń uıymdastyrýymen «Jalǵan aqsha jasaý», oǵan qarsy is-áreketter men problemalar, joıýǵa usynystar» taqyrybynda oblystyq prokýratýra, Ulttyq bank, ekinshi deńgeıdegi bank ókilderi jáne kásipkerlerdiń qatysýymen birlesken «dóńgelek ústel» ótti.
Ekonomıkalyq qylmystyń jalpy úlesinde jalǵan aqsha jasaý faktisi 15 %-dy quraıdy. Osy oraıda, Qyzylorda oblysy boıynsha memlekettik kirister departamenti basshysynyń orynbasary Ǵanı Seıtjanuly óz sózinde Ekonomıkalyq tergeý qyzmeti jalǵan aqsha jasaý jáne saqtaý, ótkizý faktilerine qarsy is-áreket boıynsha Qyzylorda oblysynda oryn alyp jatqan jaǵdaıdy habarlady.
Atalǵan qylmysty ýaqytyly ashý jáne kinálilerdi jazalaý máselesi búginde ózekti bolyp otyr. О́tken jyly jalǵan aqsha jasaý faktisi boıynsha 10 qylmystyq is tirkelse, bıylǵy jyldyń qańtar aıynyń ózinde jalǵan aqsha tabylǵan eki fakti bar.
Qylmystyń atalǵan sanatyn anyqtaý kóbine kásipkerler men bank qyzmetkerleriniń jalǵan kýpıýranyń tabylǵandyǵy týraly ýaqytyly habarlanýyna, jalǵan aqsha qarajatyn ótkizgen árbir jer boıynsha quqyq qorǵaý organdarynyń tez arada áreket etýine baılanysty.
«Dóńgelek ústel» barysynda sharany uıymdastyrýshylar jalǵan aqsha jasaýshylyq syndy teris qylyqtardy túbirimen joıýda barlyq kúshti biriktirý qajettiligin aıtyp, kásipkerler men bank qyzmetkerlerin saýda kassalyq esepteý júrgizý kezinde qolma-qol aqsha qarajatyn meılinshe azaıtýǵa, ǵalamtor resýrstaryn paıdalanýǵa shaqyrdy.
Joldybaı Bazar.
Derek, sýret: Qyzylorda oblysy kásipkerler palatasynyń baspasóz qyzmeti.