Este bolsa, byltyr elimizde «Ákeler kúni» belgilenip, alǵash ret resmı atalyp ótken edi. Maýsymnyń úshinshi jeksenbisi dep bekitilgen kúndi elordalyqtar bıyl da óz deńgeıinde merekeledi.
Bul kúni qala jurtshylyǵy «Baıqońyr» aýdanynyń «Atatúrik» saıabaǵynda «Ulttyq oıyn – ult qazynasy» degen ataýmen ótken kóńildi dodany tamashalady. Ákeler men balalar tóbe kórsetken saıysta 10 top, ıaǵnı 10 otbasy baq synasty. Qazaqtyń tól oıyndaryn tanytýmen shektelmeı, otbasy ınstıtýtyn nyǵaıtý maqsatynda uıymdastyrylǵan saıystyń jóni bólek. О́ıtkeni munda áke róliniń mańyzdylyǵyn kórsetý, otbasy qundylyqtaryn dáripteý, áke men bala arasyndaǵy qarym-qatynasty nyǵaıtý sekildi eń negizi maqsat-murat bar.
Saıysta ákeler men balalar «Arqan tartý», «Bes tas», «Asyq atý», «Toǵyzqumalaq», «Láńgi tebý» sekildi oıyndarda synǵa túsip, kim myqtyny anyqtady. Alamannyń basty júldesi kóptiń ishinen daralanǵan Aıdar Shonaev pen balasy Tańatqan Nurıslam jubyna buıyrdy.
«Biz Baıqońyr aýdanyndaǵy №4 mektep gımnazııasynan keldik. О́zim sol mektepte dene shynyqtyrý pániniń muǵalimimin. Al ulym Tańatqan osy bilim ordasynyń oqýshysy. Búgin ekeýmiz mektebimizdiń namysyn sátti qorǵadyq. Basqa qatysýshylar da aqtyq sátke deıin laıyqty básekelesti. Biri láńgi tebýden úzdik bolsa, ekinshisi arqan tartýǵa kelgende aldyna qara saldyrmady. Bastysy, jarys óte tartysty ótti. Ulym ekeýmiz dán rızamyz. Árıne, osyndaı ulttyq sportty damytýǵa, nasıhattaýǵa baǵyttalǵan saıystardyń kóbirek uıymdastyrylǵanyn qoldaımyn», deıdi Aıdar Shonaev.
Ákeler kúni qarsańynda elimizdiń birneshe óńirinde dástúrli otbasylyq qundylyqtardy áspettep, «úlgili otbasy» ıdeıasyn nasıhattaý maqsatynda túrli is-shara uıymdastyryldy. «Otan – otbasynan bastalady». Al otbasynda ananyń orny qandaı bolsa, ákeniń de orny sodan kem emes. Qara shańyraqtyń ıesi – ákeler. Analar kúnimen qatar ákeler kúnin de atap ótýdiń artyqshylyǵy osynda.