Memleket basshysy «Mass-medıa» týraly zańǵa qol qoıdy. Zań medıa salasy ókilderiniń, kópshilik qoǵamnyń jan-jaqty ári keń aýqymdy talqysynan ótti. Sol sebepti zań halyqqa qyzmet etetin mańyzdy qujat bolady dep senemiz.
Zańnyń ázirlenýine, jan-jaqty jetilýine atsalysqan barsha azamatqa zor alǵys bildiremin. Onyń ishinde depýtattyq korpýs, jýrnalıstik qoǵamdastyq, úkimettik emes uıymdar belsendi qatysyp, elimiz úshin osy mańyzdy zańdy ázirleýge aıryqsha úles qosqanyn atap ótkim keledi.
«Mass-medıa» týraly jańa zań zaman talabyna saı qajet boldy.
1999 jyly qabyldanǵan qazirgi qoldanystaǵy zańǵa 40-tan astam ózgeris engizildi. Kópjyldyq qujatty jetildirip, zamanǵa saı beıimdeý – ýaqyt qajettiliginiń aıqyn kórinisi.
Memleket basshysynyń tapsyrmasymen zańdy qaıta qaraý jumysy qolǵa alyndy. Mádenıet jáne aqparat mınıstrligi deńgeıinde zań túrli múddeli taraptardyń qatysýymen belsendi túrde talqylandy, bul aldaǵy ózgeristerdi jan-jaqty qalyptastyrýǵa múmkindik berdi.
Zań jobasynyń jan-jaqty ári tereń talqylanýyna depýtattyq korpýs pen Parlamenttegi jýrnalıster ókildigi yqpal etti. Olardyń belsendi jumysy arqyly barlyq aspekti men erekshelik eskerilip, zań zamanaýı medıa keńistiktiń qajettiligine barynsha beıimdeldi.
Tıimdi quqyqtyq tetikterdi ázirleý maqsatynda qurylǵan jumys toby 57 otyrys ótkizip, oǵan BAQ ókilderi, sarapshylar men azamattyq qoǵam ókilderi belsene qatysty.
Osy mańyzdy úderiske qatysqandardyń barlyǵyna taǵy da alǵys aıtamyn. Sizderdiń qajyrly eńbekterińiz ben birlese atqarǵan jumystaryńyz elimizdegi medıa salasyn odan ári damytýǵa negiz bolatyn tarıhı qujat jasaýǵa múmkindik berdi. Bárimiz birlesip Qazaqstannyń medıa keńistigin ashyq ári jemisti jumys isteýi jolynda jumyla qyzmet etemiz dep senemin.
Aıda BALAEVA,
Mádenıet jáne aqparat mınıstri