Atyraý oblysynda kóne tarıhtyń kómbesinen syr shertetin qorǵandar men tarıhı oryndar az emes. Qazir Qyzylqoǵa aýdanyndaǵy Qarabaý, Mahambet aýdanynyń Saraıshyq aýlynda arheologııalyq qazba jumysy júrip jatyr.
Qyzylqoǵa aýdany aýmaǵyndaǵy qazba jumysyn oblystyq tarıhı-ólketaný mýzeıi janynan qurylǵan ekspedısııa júzege asyrady. Ekspedısııaǵa tarıh ǵylymdarynyń kandıdaty Marat Qasenov jetekshilik etedi.
«Mýzeı janyndaǵy ekspedısııanyń músheleri maýsym-tamyz aılarynda Qyzylqoǵa aýdanyndaǵy erte temir dáýirine jatatyn Qarabaý-2 qorǵanyna arheologııalyq qazba jumysyn júrgizedi. Atalǵan qorǵannyń dıametri – 70 metr, al bıiktigi – 300 santımetr. Bul qorǵan Qarabaý aýlynan soltústik batysqa qaraı 8,5 shaqyrym qashyqtyqta ornalasqan», dep habarlady oblystyq mýzeıden.
Al Saraıshyq aýyldyq okrýginiń ákimi Janat Kenjeǵalıevanyń aıtýynsha, sý tasqyny kezinde arheologııalyq qazba oryndaryna zaqym kelmegen. Qazir Jaıyq ózeniniń jaǵalaýyndaǵy tarıhı orynda da qazba jumysy bastaldy.
«Arheologııalyq qazba jumysyna «Saraıshyq» memlekettik tarıhı-mádenı mýzeı-qoryǵy» RMQK-dan 3 arheolog, H.Dosmuhamedov atyndaǵy Atyraý ýnıversıtetinen 18, Batys Qazaqstan oblysyndaǵy ýnıversıtetten 22 stýdent kiristi. Qazba jumysy shilde aıyna deıin jalǵasady», deıdi Janat Kenjeǵalıeva.
Atyraý oblysy