Qazirgi almaǵaıyp tusta medıa keńistiktegi aqparattyń burmalanýy, feık, manıpýlıasııalyq derekterdiń jıi kórinis tabýy jýrnalıstiń mindetin, qoǵam aldyndaǵy jaýapkershiligin kúsheıte tústi. Ári kásibı jýrnalıstıka túrli kıberqylmys, óshpendilik sıpattaǵy derekterdiń keń etek alýynan, sıfrlyq tehnologııa esebinen kedergilerge ushyrap otyr.
Tilshilik tirlikte qaýip kóp. Sondyqtan demokratııalyq elderde azamattyq qoǵamnyń róli jeke adamnyń quqyqtaryn jáne kásibı múddelerdi qorǵaýda mańyzdy. Sol sekildi, jýrnalısterdiń múddesin tolyq jetkize alatyn, qorǵaı alatyn óz aldyna ınstıtýt qajet. Bul rette jańa zań aıasynda jýrnalısterdiń quqyqtaryn qorǵaý máseleleri boıynsha táýelsiz qaýymdastyqtyń qurylýy týyndaǵan problemalardy jedel sheshýge jáne memleketpen birlesip jýrnalısterdiń quqyqtaryn qorǵaýdy qamtamasyz etý tetikterin jedel ázirleýge múmkindik beredi.
Ásirese tótenshe jaǵdaı tusynda jýrnalıstiń ómiri qyl ústinde bolady. Osy tusta qujat aıasynda ár jumys orny álemdik jetekshi BAQ tájirıbesine saı qajetti qorǵanys quraldarymen qamtamasyz etýge mindettelgeni quptarlyq is.
Sondaı-aq qujat negizinde endi memlekettik emes BAQ quraldaryna granttar berý, BAQ-taǵy materıaldarǵa talap qoıý merzimi, BAQ suraýlarynyń bes kúnnen jeti kúnge deıin qaraý tártibi, jýrnalısterdiń Ádep kodeksin bekitý týraly ótkir máseleler óz sheshimin tabady. Oǵan qosa sýısıd jasaý tásilderi, sýısıdke shaqyrý týraly aqparat taratýǵa tyıym salynady. Sheteldik BAQ-tyń ókildikteri men olardyń jýrnalısterin akkredıtteý tártibi de jetildirildi.
Memlekettik tildegi tele-radıo baǵdarlamalardy taratý jáne otandyq kontent kólemi boıynsha talaptardy 2025 jyldan bastap – 55, 2027 jyldan bastap tele-radıbaǵdarlamalardyń jalpy kólemin 60 paıyzǵa ulǵaıtý kózdelgen. Sáıkesinshe, otandyq tele-radıo arnalarda sheteldik tele-radıo baǵdarlamalaryn retranslıasııalaý kólemi 20-dan 10 paıyzǵa deıin tómendetildi.
Qanat ÁÝESBAI,
fılologııa ǵylymdarynyń kandıdaty, jýrnalıst