Onyń júregine jalǵyzdyq shoǵy túsip ketken be dersiń. Áıteýir az ǵana óleńderinen osyndaı saryn, jalǵyzdyń muńy men sher-zary baıqalyp turady. 19 jyl ómir súrgen aqynnyń óleńderindegi oı-óris pen tanym-túsinik múlde basqasha. Ýaqytynan buryn eseıgen jannyń tolǵamy seni de tolǵandyrmaı qoımaıtyn sekildi.
Saltanat Abashovanyń qamshynyń sabyndaı qysqa ǵumyrynda qansha óleń jazǵanyn kim bilsin? Áıteýir qol sómkesi men chemodannyń qýysynan 7-8 óleńi tabylypty. Bir belgilisi – 2007 jyly oblys ákimdiginiń qoldaýymen shyqqan «Tusaýkeser» jastar antologııasyna sol 7-8 óleńi engen. Bar bolǵany osy ǵana.
«Mahabbatqa kerek emes kirispe,
Seni oılasam jatady ylǵı muń ishte.
Arman ánin ashyq, anyq aıta almas,
Qyzdyń janyn kim túsiner jińishke», degen jalqy shýmaqtyń ózi onyń jan dúnıesindegi alasapyran kúıden syr shertip turǵandaı kórinedi. Al «Mahabbatqa kerek emes kirispe» degen tarmaqtyń ózinen endi ǵana boıjetken qyzdyń emes, tolysqan aqynnyń oı-tolǵaýyn ańǵarǵandaı kúı keshesiń. Rasynda da, onyń janyn eshkim túsinbedi me dep qaýiptenesiń. Ishke túsken órt shyǵar sol, jan álemin kúl-talqan etken...
«Aqynnyń jany shydaı almady,
Usaq áreketterge kektendi.
Qoǵamǵa mynaý unaı almady,
Unaı almaǵan soń mert boldy».
Bloknotymdy aqtaryp otyryp, osyndaı shýmaqtardyń birin taýyp aldym. Astyna «D. Rıabov» dep jazyp qoıyppyn. Shamasy qazirgi orys aqyndarynyń shýmaqtarynyń birin tárjimelesem kerek. Osy bir tórt tarmaqty ishteı oqyǵanda Saltanattyń da áldenege shydaı almaǵanyn sezgendeı kúı keshtim. Biraq onyń kóńilin buzǵan, júregine shımaı syzǵan ne ekenin so kúıi uǵa almadym. Aqynnyń jany jumbaq bolatynyn sonda túsingendeı boldym.
«Kókiregim kók tuman, bul is anyq
Túnge aınalyp kúnimiz jylysa aǵyp.
Úsik uryp úrkektep, úreı ushyp,
Úmitimniń barady gúli solyp»,
deıdi Saltanat taǵy bir óleńinde ókinishtiń sııasyna qalamyn malyp.
«Shyrmaǵaly keýdemdi kúdik taby,
Qashan janym úmitti umytqaly!
Aspan ashyq, kún jaryq, biraq, biraq,
Sýyq bári, súıkimsiz sýyq bári»,
degen aqyn shýmaǵynan kóńildi kóktem etken úmit gúliniń shilińgir shildede qýraı bastaǵanyn ańǵarý áste qıyn emes. Qyz júregindegi jaranyń jazylmas dertke aınalǵanyn da aıqyn sezinesiń. Ah urasyń. Amal neshik...
Saltanat keıde óz ólimin ózi jazyp ketken aqyn sekildi kórinedi. Ol ómir shamyndaǵy biltesiniń túgesile bastaǵanyn ishteı sezgendeı kórinedi. Taǵdyrynyń taqtasyndaǵy jazýdyń mánin erte uǵynyp qoıýdan asqan qasiret bar ma deseńizshi...
Ol da mezgilinen buryn bárin bildi. Dóńgelengen dúnıeniń buryshynan qyzyq izdegisi kelmedi, óıtkeni ol jeńil-jelpi oılaı almaıtyn edi. Sol túpsiz tereń oı onyń janyn tuńǵıyqqa tarta bergen sekildi. Ol tuńǵıyq álgi eń tereń jerde jatqan Marıana shuńǵymasynan da áride ornalasqan ba dersiń... Ony tómendegi shýmaqtan da aıqyn ańǵarýǵa bolatyn sekildi.
«Qıyn eken jetýi baqytqa adam,
Bermedi me mursha álde ýaqyt maǵan.
Qańqam keýip, sulbasy saǵymdanǵan,
Bul dúnıege syımastan ketip baram»,
degen shýmaqqa búkil renishin syıǵyzyp ketkendeı kórinedi. Árıne, ol osy bir tórt tarmaqta ah uryp turǵan joq. Tipti táleıine nálet aıtyp turǵanyn da baıqatqysy kelmeıtindeı kórinedi. Biraq parasat-paıymy men oı-tanymy bıik jas talant taǵdyrdyń tosyn synyna salmaqtylyqpen jaýap bere otyryp, ózegindegi ókinishtiń otyna shydaı almaǵanyn baıqatyp turǵanyn ańǵarý qıyn emes.
«Tirshilikte kórmegen saıran quryp,
Aqyn óldi, aǵashqa baılandy úmit.
Aqyn óldi, júregin erip ketken,
Tas emes, qorǵasynǵa aınaldyryp»,
deppiz taǵy bir aqynnyń óleńin tárjimelep otyryp.
Dám-tuzdyń taýsylǵany ma, kim bilsin? «Mahabbatqa kerek emes kirispe» dep jyrlaǵan Saltanat Abashova nebári 19 jasynda baqılyq boldy. О́zi ómiriniń kirispesin kórip úlgerdi me eken deımiz ishte bir shoq tutanyp. Kim bilsin...
Jambyl oblysy