Kenshiler qalasynyń ákimi bolyp Murat Erbolatuly Bóribaev taǵaıyndaldy. Jańa ákimdi qala aktıvine oblys ákimi Berik Ábdiǵalıuly tanystyrdy.
Murat Bóribaev 1991 jyly Qarsaqbaı kentinde dúnıege kelgen.
Ol 2012 jyly Qaraǵandy memlekettik tehnıkalyq ýnıversıtetin «Metallýrgııa qara jáne tústi metalldar» mamandyǵy boıynsha, 2014 jyly Qaraǵandy Qaztutynýodaǵy ekonomıkalyq ýnıversıtetin «Ekonomıka» mamandyǵy boıynsha támamdaǵan. 2021 jyly Qazaqstan Respýblıkasy Prezıdenti janyndaǵy Memlekettik basqarý Akademııasynda oqyp, «Memlekettik menedjment» magıstri atanǵan. Eńbek jolyn 2011 jyly Nurqazǵan baıytý fabrıkasynda flotator bolyp bastaǵan M. Bóribaev keıin seh sheberi, bastyǵy boldy. 2015 jyly Nurqazǵan baıytý fabrıkasynyń dırektory, 2017 jyldan bastap taǵaıyndalǵanǵa sheıin Jezqazǵan baıytý fabrıkasynyń dırektory qyzmetinde boldy.«Kenshiler qalasyna óndiristiń qazanynda qaınap, pisip, jetilgen azamattyń taǵaıyndalǵanyn quptaımyn. Murat Erbolatulynyń rýhanııatqa jaqyn ekenin de, ulttyq qundylyqtardy dáriptep júrgenin de jaqsy bilemin. Sondyqtan, qasıetti Qanysh Imantaıulynyń esimin ıelengen qalaǵa jańa turpatty basshy keldi dep senemin», dedi ken óndirisiniń ardageri, qalanyń Qurmetti azamaty Musa Tileýov.