Baspanaly bolý – bir baqyt. Taıaýda zerendilik kópbalaly otbasylar men jetim balalar baspanaly boldy. On otbasy úshin aq túıeniń qarny jarylǵan osynaý sát kópten kútken aqjarylqap oqıǵa edi.
Zerendi aýdanynda 19 myń sharshy metrden asa turǵyn úı paıdalanýǵa berildi. Ilkimdi atqarylǵan is aýdanda páter kezeginde turǵandardyń sanyn meılinshe qysqartýǵa septigin tıgizip jatyr. Áleýmettik jaǵynan az qamtylǵan adamdar da jaqsylyqqa kenelip, shat-shadyman bolyp qaldy. Jarqyraǵan jańa úılerdiń kiltin oblys ákimi Marat Ahmetjanov tabys etti.
– El Prezıdenti Qasym-Jomart Toqaev birinshi kezekte adamdardyń ómir súrý sapasyn jaqsartýǵa baǵyttalǵan áleýmettik jobalardy júzege asyrýǵa erekshe nazar aýdaryp otyr. Bul aradaǵy eń basty másele – turǵyn úımen qamtamasyz etý. Úıi joqtyń kúıi bolmaıtyny belgili. Bul taraptaǵy máselelerdi sheshý úshin memlekettik baǵdarlamalar qabyldanyp otyr. Jańa jumys oryndary ashylyp jatyr. Jerlesterimiz turatyn zaman talabyna saı jaqsy úıler salynyp jatyr. Eń bastysy, halyqtyń ál-aýqatyn jaqsartý, – dedi oblys ákimi.
Kópbalaly analardyń biri Gúlzada Aqpaeva jarymen birge bes bala tárbıelep otyr. Árıne, jeke úı salyp alýǵa múmkindikteri bolmaǵan. 2012 jyldan beri úı kezeginde turdy. Endi, mine, memlekettiń qamqorlyǵynyń arqasynda ózimizdiki degen sáýletti de keń páter berilip otyr. Qolyna baspana kiltin ustaǵan ananyń jan dúnıesi qamqorlyq shýaǵymen nurlanyp, kóńili de bosap ketti. Ásirese balalardyń qýanyshynda shek joq. Osy arada bala qýantýdyń ózi baqytty sát-aý degen oı keldi. Jańa páterler bilim oshaǵyna taıaqtastam jerde. Jaqyn arada turmysqa qajetti nysandardyń bári bar.
Analar osyndaı shýaqqa bólegen Memleket basshysyna aq alǵysyn jaýdyryp jatyr. Ana alǵysyn alǵan adamnyń aldynan baqyt qaqpasy ashylary sózsiz.
Aqmola oblysy,Zerendi aýdany