Búginde bir táýiri, qadam attaǵan saıyn antalaǵan dúken. Qaı-qaısysyna bas suqsań da qalaǵanyń tabyla ketip jatady. Olarǵa osy jolǵy buıymtaı qorjyn toltyrý emes, jergilikti ónimderdiń ótimin baıqastaý bolatyn. Shyndyǵyn aıtqanda, buǵan deıingideı ózimizdiki me, ózgeniki me kirgen bette sórelerden menmundalaǵanyna qol sozýǵa umtylmaı, elimizde daıyndalǵandaryn izdestirdik. Ol ońaı sharýa emes eken. Qaptaǵan taýarlardyń ishinen basqasyn bylaı qoıǵanda, Qaraǵandyda shyǵarylatyndaryn tabý qıyn boldy. Al «Qazaqstanda jasalǵan» aksııasy boıynsha sondaı jarnama birden kózge urarlyq tustarda jınaqtalýǵa tıistilerin kóremiz be degen úmitimiz de úzilip qaldy. Mundaı múıister múldem joq bolyp shyqty.
Kóp rette aımaǵymyzdyń azyq-túligin satyp alǵymyz keledi. Qaraǵandy konfetiniń, Balqash balyǵynyń, Qarqaraly qol maıynyń, Topar kartobynyń, Kóksý qııarynyń alys-jaqynnan ákelinetinderden dámdilik, qunarlyq sapasy jaǵynan artyp túspese, esh kemdigi joǵyn bilemiz. Baǵasy bosa-bolmasyn tıimdi. Ańsar aýsa ne amal bar, sórelerdiń qýystaý bólikterinen, eleýsizdeý buryshtardan ázer taýyp alyp júremiz, deıdi tutynýshylar. Qazaqstandyq ónimderdi kórnekti oryndarda jarqyratyp satý bylaı tursyn, jurt aıaǵy áste basylmaıtyn dúkenderde onyń bar-joǵy da belgisiz kórindi. Shahtınskide jasalatyn kir jýý quraldary da kózge túspedi. Kelýshiler ádettegideı sheteldik túrlerine umtylady eken. Qaraǵandynyń ózindegi margarın zaýytynyń maıonez ónimderi az bolmasa da Reseıdiń «Rıchchosy» alystan qyzyqtyrmaı qoımaıtyndaı tustardan kóz tartsa, Qyzylordanyń juqa japsyrmaǵa keptelgen kúrishi Novosibirdiń ádemi qaptalǵan ónimine qaraǵanda elerlikteı emestigi kóńil túsirdi. Molynan qoıylǵan jergilikti et pen sút, un men nan ónimderiniń ǵana ótimdiligi baıqaldy. Oblysymyzda keıingi kezde kórshi elderden jetkiziletin azyq-túlik ulǵaıyp otyr. Oramyna, qaptamasyna qarasań, bári ádemi-aq. Sondyqtan, tutynýshylar qyzyǵýshylyǵyn týdyratyn tárizdi. Bizdiń óndirýshiler de osy jaǵyn úılestirýi kerek. Jalpy alǵanda, taýarlardyń qaı túri bolmasyn, máselen, qurylys materıaldary, jylytý jabdyqtary, tigin buıymdary jetkiliksiz emes. Solar ár dúkende arnaýly bólimderge iriktelip qoıylyp satylýy uıymdastyrylsa, nazar aýdartpaı qoımas edi, degen tutynýshylar pikiri saýda oryndaryn oılantýǵa tıis.
Aıqyn NESIPBAI, «Egemen Qazaqstan».
QARAǴANDY.