Tabıǵaty tamyljyǵan, Saýyr-Saıqan taýynyń bókterinde qonys tepken «Báıterek» mádenı-sporttyq saýyqtyrý ortalyǵyna kelgen kezde bizdi dırektor Anarbek Dútbaev qarsy aldy. О́z isine myǵym, jas bolsa da iskerligimen esimi aýyzǵa iline bastaǵan Anarbek Jaqypbekuly birden atqaryp jatqan jumystarymen tanystyra bastady.
– Bul mekeme Shyǵys óńirinde birinshi bolyp ashyldy. Qurylysty nebári bir jylda tájirıbeli maman, «Zaısan qurylys» mekemesiniń basshysy Bolat Nurasyldyń jigitteri salyp berdi. Olarǵa, sol kezdegi bastama kóterip, keremet ortalyqtyń ashylýyna qamqorlyq jasaǵan Serik Zınabekulyna alǵysymyz erekshe. «Báıterek» ortalyǵyna mekteptegi daryndy balalar, kóp balaly otbasyndaǵy shákirtter, turmysy nashar jandardyń balalary kelip, 12 kún boıy taza aýada demalady, kóńilderin kóterip, túrli sport jarystaryn ótkizedi. О́tken jyly aýdannyń 420 balasy, sondaı-aq basqa óńirlerden 100 bala kelip aýnap-qýnap qaıtty. Aýdannyń oqýshylary bıýdjet esebinen demalsa, basqa jaqtan kelgender nebári 12 myń teńgeden tóledi. Aqyly qyzmet kórsetip, qarjy tabý máselesi de sheshimin tapqan, tórt maýsym boıy oblys turǵyndary da kelip, densaýlyqtaryn túzep qaıtady, – dedi ortalyq basshysy Anarbek Jaqypbekuly. Anarbek memlekettik qyzmette ysylǵan, mektepte ustazdyq qurǵan, dırektor qyzmetinde de mol tájirıbe jınaǵan azamat eken. Ol balalardyń psıhologııasyn jetik biledi, olarmen áńgimelesip, barlyq jaǵdaıdy jasaıtyn kórinedi. Ortalyqta qazir 13 úı, onyń 8-i jataqhana, ashana, voleıbol, basketbol, badmınton, fýtbol alańdary bar. Tabıǵaty tamyljyǵan Besterek qoryqshasynda atpen serýendeýge, qarda syrǵanaıtyn shanamen demalýǵa jaǵdaı jasalǵan. Munda sport jarystary turaqty ótip turady. Máselen, ótken jyldyń jazynda Qytaıdyń Jemeneı aýdanynan 17 oqýshy osy jerde úsh kún demalǵan kezde «Báıterektiń» balalarymen fýtbol, voleıboldan jarysypty. Al kerisinshe Zaısannyń balalary Jemeneıge barǵanda, qarsylastaryn utyp ketipti. Ortalyqtyń Zaısan qalasynda 18 oryndyq qonaqúıi, balalardyń oıyn alańdary bar. Qosymsha qyzmetten túsken qarjyǵa qajetti zattardy satyp alamyz deıdi dırektor. Demalys ortalyǵy mańynda jabaıy alma, almurt, qoıbúldirgen, tańqýraı, neshe túrli shıpaly ósimdikter kóp bolǵandyqtan, mektep oqýshylary olardy jınaýǵa qolǵabys jasaıtyn kórinedi. Demalys ortalyǵynyń dırektory Anarbek Dútbaev bes memleket arasynda ótken ekonomıkalyq kórsetkishi úshin «Ekonomıka maqtanyshy» degen ordenmen marapattalypty. Osy mekemeniń bas esepshisi Almash Donbaevaǵa «kásibı saladaǵy jetistigi úshin» medali, al feldsher Almas Seıithanovqa úzdik sertıfıkat tabys etildi. – 2015 jyly Qazaqstan, Ýkraına, Belarýs, Reseı jáne Ázerbaıjan sııaqty bes memleket arasynda júrgizilgen ekonomıkalyq reıtıngte jaqsy nátıje kórsetkeni úshin «Báıterek» ortalyǵy «2015 jyldyń sala kóshbasshysy» degen sertıfıkatqa ıe boldy. Aýdan ákimi Almas Ońdaqanov qýanyshty habardy estigen kezde ujymdy arnaıy kelip quttyqtap, tabys tiledi, – dep áńgimege aralasty aýdandyq máslıhattyń hatshysy Dáýlet Ydyryshev. Demek, bási bıik «Báıterektiń» aldaǵy ýaqytta da bolashaq urpaqqa adal qyzmet ete beretini sózsiz.
Ońdasyn ELÝBAI, jýrnalıst. Shyǵys Qazaqstan oblysy, Zaısan aýdany. Sýrette: ortalyqtyń qyzmetkerleri.