Osydan bes jyl buryn halyqaralyq «Art Basel Miami» atty sýretshiler jármeńkesinde 120 myń dollarǵa baǵalanǵan Maýrısıo Kettalannyń jańa «óner týyndysy» kórermenge jol tartty. Áıgili Edvard Mýnktiń «Aıqaıynan» da qymbatqa túsken bul shyǵarma –skotchpen qabyrǵaǵa japsyrylǵan kádimgi banan boldy. Bizdiń qoǵamda da óziniń qunynan áldeqaıda joǵary baǵalanyp jatqan qanshama «óner týyndylary» bar deseńizshi. Ásirese án mátinindegi áttegen-aılar...
Máselen, qazaq estradasynda beleń alyp jatqan úlgisi nashar úrdisterdiń biri – jappaı sóz oınatý. Bul naýqasqa áýeli aıtyskerler qatty shaldyǵyp edi. О́leńniń sońǵy eki tarmaǵyn ishki uıqasqa túsirip alyp, shýmaqty shubyrta beredi. Keıin osy aqyndar ánge sóz jazýǵa kirisip, ol jaqtyń da tunyǵyn laılady. Oı taıazdyǵyn baltalasa murty buzylmaıtyn uıqaspen jasyrý ádisin aıtystan ánge ákelip qurtty.
Osy tektes ánderde lırıkadan góri keıipkerlerdiń ishki polemıkasy jıi boı kóteredi. Qyz ben jigittiń názik mahabbatynan góri, qara dúrsin sóz qaǵysy basym. Qyzdy alyp qashyp, kelin qylý, aýyldyń qaladan jaqsyraq ekenin dáleldeý, qalyń mal sııaqty taqyryptarǵa qurylǵan ánder mahabbattyń múbárak músinin aıǵyzdaıtyndaı kórinedi. Jaqynda sózin aıtysker Qaınar Alagózov, áýenin tanymal ánshi Ádilet Jaýǵashar jazǵan «Mahir» degen án jaryqqa shyqty. Onda da joǵarydaǵy belgilerdi baıqaýǵa bolady.
Janym máhir, máhir dep,Ah urasyń aqym dep. Kóneıin saǵan.Erkeletip kúnbe kún,Qyrdyń qyzyl gúlderin tereıin saǵan.
Endi qalaı syr asham,Ertegińdi qurasań,Djet samolet surasań, ne deıin saǵan?
Kezinde Mańǵystaýda sóz-shalyq bolǵan aqynsymaq Qashaǵan jyraýdyń batasyn alamyn dep qıylyp qoımaı, bılerdiń aldynda áńgilenip «ánin» aıtypty. Onymen qoımaı «batańdy berseń jyldam ber» dep beıádeptik tanytady. Sonda adaıdyń Mátjan Tileýmaǵambetuly degen ulyq bıi aqylsyz óleńińniń aqysy dep «aqyndy» qamshynyń astyna alady. Mine, óleńniń aldyndaǵy jaýapkershilik! Qazir zaman basqa. Úregeılerdiń únin óshirip, dúregeılerge dúre soǵyp júrgen eshkim joq. Áıtse de óner týyndylaryn sahnaǵa shyǵarmas buryn synnyń sıratynan ótkizip alý qajet-aq.
Aıtpaqshy, joǵaryda aıtqan Maýrısıo Kettalannyń banany el nazaryna usynylǵannan keıin, mynadaı qyzyq ári kúlkili jaǵdaı bolady. No Hen Sý atty Koreı ýnıversıtetiniń stýdenti kórýshiler tarqaǵannan keıin «óner týyndysyn» jep qoıady. Keıin tentek bala banannyń qabyǵyn qaıtadan ornyna japsyryp ketedi. Stýdent bul áreketin túski asty ishpeı shyǵyp, qarny ábden ashyp qalǵanymen túsindirgen. Osylaısha, 120 myń dollarǵa baǵalanǵan «óner týyndysy» jannyń emes, tánniń azyǵy bolyp kete barǵan.