Elimizde oqýshylar men pedagogterge baǵdarlamalaý negizderi oqytylady. Osy úshin arnaıy onlaın bilim berý platformasynyń qanatqaqty jobasy iske qosyldy. Bul týraly Oqý-aǵartý mınıstrligi habarlady.
Mınıstrliktiń taratqan aqparatyna súıensek, pedagogter men oqýshylar jasandy ıntellektini qoldaný jáne baǵdarlamalaý daǵdylaryn meńgeredi. Memleket basshysynyń tapsyrmasy boıynsha Oqý-aǵartý mınıstrligi Sıfrlyq damý, ınnovasııalar jáne aeroǵarysh ónerkásibi mınıstrligimen, Astana hub halyqaralyq tehnoparkimen jáne «О́rleý» biliktilikti arttyrý ulttyq ortalyǵy» aksıonerlik qoǵamymen birlesip oqýshylar men pedagogterge arnalǵan baǵdarlamalaý negizderin oqytatyn onlaın-bilim berý platformasynyń qanatqaqty jobasyn iske qosty. Bastapqy kezeńde 300 muǵalim men trener «Jasandy ıntellekt» jáne Game Development baǵyttary boıynsha biliktiligin arttyrady. Bıyl 31 jeltoqsanda aıaqtalatyn kýrstar alty aıǵa josparlanǵan. Kýrs aıaqtalǵan soń, árbir qatysýshyǵa sertıfıkat beriledi, olar ári qaraı oqýshylar men pedagogterdi baǵdarlamalaý negizderine oqyta alady.
Orta bilim berý komıtetiniń basqarma basshysy Gúlnar Talasbaeva bul týraly: «Jobaǵa qatysýshylar baǵdarlamalaý negizderi boıynsha bıyl shilde-jeltoqsan aralyǵynda onlaın rejimde «No Code», «Low Code» jáne «Startup Academy» kýrstaryn jáne oflaın 2025 jyldyń qańtarynan bastap baǵdarlamalaý negizderi boıynsha oqıdy. Qazir Astana Hub platformasynda bilim alýshylardy onlaın tirkeý júrip jatyr. Ár oqýshyǵa qupııa sóz ben logın beriledi, onyń kómegimen olar modýlderdi ıgerip, tapsyrmalardy oryndap, testileýden óte alady. Barlyq modýlden sátti ótken bilim alýshylarǵa kýrsty aıaqtaǵany týraly sertıfıkat beriledi, bul IT-ónimderdi jasaýǵa múmkindik beredi», dep atap ótti.
Aıta ketý kerek, oqýshylar ózderine yńǵaıly ýaqytta oqı alady. Ár sabaqta beınedáris, qosymsha materıaldar jáne test tapsyrmalary bar. Sondaı-aq qatysýshylar qanatqaqty joba úılestirýshilerinen kómek suraı alady. Atalǵan joba barlyǵy 27 myńnan asa oqýshyny qamtıdy.