Keshe Abylaı han alańynda elimizde balamasy joq mýltımedııalyq ınteraktıvti keshen jańǵyrtýdan keıin qaıta ashyldy.
Memleket basshysy Qasym-Jomart Toqaev týrızmdi damytý jóninde ótkizgen keńeste salanyń álemdik ekonomıkany qarqyndy damytýdyń katalızatory ekenin aıtyp, birqatar naqty tapsyrma bergen edi. Búgingi ońynan ońǵarylǵan sharýa Memleket basshysynyń tapsyrmasyn múltiksiz oryndaý barysynda atqarylǵan is ekenin atap aıtýymyz qajet. Tabıǵaty tamyljyǵan erke Kóksheniń baýraıynda el týrızmi jańa sıpatqa ıe bolyp kele jatyr. Negizinde bul sala ınvestorlar úshin meılinshe tartymdy ekeni de belgili. Alys-jaqyn shetelden kelgen demalýshylardy qabyldap, tól tarıhymyzdyń tylsym syryn uqtyratyn mol múmkindik týyp otyr. Zamanaýı keshen elimizdegi eń joǵary tehnologııalyq ınteraktıvti murajaılardyń birine aınalmaq.
Saltanatty is-sharaǵa Mádenıet jáne aqparat mınıstri Aıda Balaeva, Aqmola oblysynyń ákimi Marat Ahmetjanov, Prezıdent Is basqarýshysynyń orynbasary Rýstam Baıalıev jáne t.b. qatysty.
«Býrabaıdyń tumsa tabıǵatyn, tarıhı-mádenı baılyǵyn kópshilikke tanytý – óte ózekti. Búgingi zamanaýı ınnovasııalyq keshenniń ashylýy óskeleń urpaqty otansúıgishtikke tárbıeleýde mańyzdy qadamdardyń biri dep esepteımin. Munda jastar óńirdi ǵylymı-shyǵarmashylyq turǵydan tereń zerdelep, rýhanı kemeldenip, mol taǵylym alady dep senemin», dedi Aıda Balaeva. Sonymen qatar mundaı keshender tek tarıhı turǵydan ǵana emes, qoǵamdyq sanany jańǵyrtýǵa yqpal etetin ozyq ınstıtýt qurýda mańyzdy ekenin atap ótti.
Kúnine 500-ge deıin demalýshylardy qabyldaı alatyn zamanaýı keshen jańa anımasııalyq jáne aýdıovızýaldy tehnologııalar arqyly el tarıhyn bilmekke umtylǵan adamdardy Alashtyń rýhanı álemine engizip, kókiregine kóne muranyń eń asylyn sińire alady.
«Mýltımedııalyq ınteraktıvti keshen – jaı ǵana mýzeı emes, bul jerde ınnovasııa men dástúr ortaq úılesim tapqan. Keshenniń Abylaı han alańynda ornalasqany – erekshe oqıǵa. Bul jer elimizdiń kıeli oryndarynyń tizimine kiredi jáne Býrabaı kýrortynyń eń basty kóz tartar orny. Mýltımedııalyq ortalyq demalys pen oıyn-saýyq orny ǵana emes, sonymen qatar mádenı pikir almasý ortalyǵy bolatynyna senemin», dedi Aqmola oblysynyń ákimi Marat Ahmetjanov.
Jazýshy-dramatýrg J.Erǵalıev arýaq qonyp, nar shókken qasıetti Kókshe topyraǵynyń, Altaıdan Atyraýǵa deıingi Alash dalasynyń qadir-qasıetin tereńnen tolǵap, sıpattap berdi. Sol qadir-qasıetti týrıster búgingi jaǵymdy jańalyq arqyly tolyqqandy bile alady. Jańa keshenniń medıakontenti oıyn-saýyq jáne tanymdyq materıaldardy negizge ala otyryp, turaqty jańartylmaq. Bul ártúrli baǵdarlamalardan rýhanı lázzat alýǵa, jańa qyzyqty da mazmundy dúnıelerdi bilýge múmkindik týdyrady.
Keshendi qaıta qurý jáne jóndeý jumystary «Kaspi.kz» aksıonerlik qoǵamynyń demeýshiligimen atqarylǵan. «Kýb 360» zaly – beıneni keskindeıtin biregeı tehnologııasy bar Qazaqstandaǵy jalǵyz zal. Bes proektormen, eki búıirlik ekran, 270 gradýstyq panoramalyq keskin jasaıdy. Bul kórermenderge fılmniń bir bóligi tárizdi áser etedi eken. Sol sátte aqseleýli qazaq dalasyn óziń aralap júrgendeı sezinesiń. Keshende 3D oryndaýynda arýaqty Abylaı hannyń aq batasyn estip, ilki zamanda el daýyn, jer daýyn jalǵyz aýyz sózben sheshken, el uıytqysy bolǵan bılerdiń beınesin kórýge bolady.
Jastar men jasóspirimderdi baýraıtyn tusy da az emes. Oıyn túrindegi ınteraktıvti ekspozısııalar balalar men sheteldik qonaqtarǵa ulttyq mýzykalyq aspaptar, oıý-órnekter, sondaı-aq qazaq dalasynyń bar bolmysyn kórsete alady. Osy keshende kelýshiler qazaqtyń ejelgi rýlaryn, olardyń tańbalaryn, mekendegen ólkelerin tamashalaı kelip, kóz janarlary sımvoldyq aǵashqa tireledi eken.
Qoryta aıtqanda, mýltımedııalyq ınteraktıvti keshenniń ashylýy el týrızmin damytý baǵytyndaǵy baǵaly is boldy.
Aqmola oblysy,
Býrabaı aýdany