Edgar Pony oqyǵan jan ómir sheńberine ózgeshe zer salary anyq. Bizge ashylǵan terezelerinen góri ashylmaǵany júz ese kóp ómir labırınti tylsym da kóne. Ony ashý úshin alǵa umtylý bárinen izgi. Bul ólimge qarsy oq atqan ómir maıdangeri Edgar Pony oqyǵannan keıingi oılar edi.
Beıne bir múıizin jasyrǵan Eskendir sekildi ishińizde bir janartaý eshqashan tynyshtyq bermeıdi. Adam qolymen jasalǵan qaǵıdattardyń syrtqy sheńberine shyǵyp, «barlyǵy sender oılaǵandaı emes!» dep baqyrýdy qalaıdy. Keıde «álemdi túgel men kórip, eshkim meni bilmese» dep topyraq haline aınalýdy kózdeıdi. Joq! Biraq bul oı az merzimge, óte qysqa ýaqytqa sozylady. Eppen sóılegen ǵalymnyń júzine qarap jaı ǵana tosyn suraq qoıý ne jan talshyǵymen syryn jaıǵan muńlyq aldynda qarqyldap kúlkisi kelý – apyr-aı, qandaı qorqynyshty sezimder. Osy bir erkindiktiń uńǵysynan soǵylǵan janartaý nege bir sátke saıabyr tappaıdy? Nege ol sonshalyq tákappar, keıde sonshalyq uıań? Ol nege bala kúni kóz aldynda bóten mysyqty talǵa darǵa asyp qoıǵan saqaldy atany, tunshyǵa jylaǵan beımálim áıeldi, zulym qolǵa qarsy turýǵa eshbir múmkindigi bolmaǵan jetim balany oılaıdy? Adam ómiri qarapaıym ǵana qatelikter men nemquraıdy, ǵylymsyz, talapsyz, armansyz, tek eptiligi ǵana bar sananyń sáttik sheshimimen búline salatyny qalaı?
O dúnıede adamdar óziniń qandaı áreketke barǵanyn, ne istegenin anyq kóredi deıdi. Qaı qıyrda júrip, qandaı izgilik etkenin ne zulymdyqqa barǵanyn qarap, jany shyrqyrar eken. Al qazir ózin únemi kórip otyratyn, baqylap otyratyn aqyl kózi ashyq adamdar kóp pe? Bilim ıeleri nadan adam ózin baqylap otyratyn kózi sóngen adam desedi. Siz óz-ózińizge esep beresiz be? Aıarlyqqa ah uryp, jaqsylyqqa oımen, nıetpen úles qosasyz ba? Siz qaıdasyz? О́zińizdiń qaı mejede kele jatqanyńyzdan habardarsyz ba, oıly oqyrman?