О́ndiriske qajetti jabdyqtardy óńirdiń ózinde óndirý bastamasy – quptaýǵa turarlyq qadam. «QazMunaıGaz» kompanııasynyń Jańaózende bastaǵan zaýyt qurylysy jańa jumys oryndaryn quryp qana qoımaı, jergilikti bıýdjetke túsetin túsimderdi ulǵaıtyp, óńir ekonomıkasyn ártaraptandyrýǵa yqpal etpek.
Munaı men gaz óndirisine qajetti jabdyqtar óndiretin zaýyttyń perımetri boıynsha qorshaý salý, aýyzsý, gaz jáne elektr qýaty jelilerin tartý sekildi negizgi jumystar oryndaldy. Ashana, baqylap ótkizý pýnkti, jataqhana jáne negizgi sehtyń irgetasy qalanyp, kirme avtojoldy tyǵyzdaý jáne tegisteý jumystary júrgizildi. Sondaı-aq aýyzsý qubyryna qosylý, qurylys qalashyǵyna deıin sýmen jabdyqtaý jelisin jóndeý, ózge de qajetti biraz jumys oryndaldy.
«Alańishilik jeliler men syrtqy ınfraqurylym nysandarynyń jobasyn ázirleýdi jaqynda aıaqtaımyz dep otyrmyz. Al shilde aıynyń sońyna deıin negizgi seh jobasyna vedomstvodan tys saraptama júrgizý aıaqtalady. Qazir modýldik bloktardy daıyndaý, zaýyttyń qosalqy ǵımarattarynyń irgetasyn montajdaý jumystary júrgizilip jatyr», dedi zaýyt ókilderi.
Zaýyt 16 túrli taýar óndiredi. Nysannyń qurylysy men qyzmet etý kezeńinde jańaózendikter úshin 250-den astam jańa jumys orny ashylady.
Mańǵystaý oblysy