Rýhanı tamyry tereń, mádenı ózegi berik qazaq halqynyń aqyl-oıyn jańa shyńǵa kóterip, ózinen keıingilerge kemeldiktiń jolyn kórsetken ǵalamdyq alyp tulǵa – Abaı.
Sirá, ár ultqa birtýar danany Jaratqannyń ózi buıyrtady. Memleket basshysy Q.Toqaev: «Abaı murasy – bizdiń ult bolyp birlesýimizge, el bolyp damýymyzǵa jol ashatyn qasterli qundylyq» dep atap kórsetkeni málim. Aqyn bolmysyndaǵy erek týmys – onyń kenen otanshyldyǵy, halqyn tereń súıýi. Álemde uly aqyndar kóp desek te, ult aqyndary az. Ultty súıý arqyly ǵana adamzattyq ólshemniń baspaldaǵyna qadam basýǵa bolady. Al elshildik qasıet – ana sútimen keletin adamshylyq arnasy. «Qalyń elim, qazaǵym, qaıran jurtym, ustarasyz aýzyńa tústi-aý murtyń» dep qam jegen otanshyl aqyn halqymen bir tutasyp ketken.
Búgin ult rýhanııatynyń qalyptasý jolyna úńilsek, Abaı joly, Abaı izi saırap jatyr. Abaı murasynda, sol muradan bastaý alǵan Alash ıdeıasynda, azattyq armanynan jaralǵan 50–60-jyldardaǵy «jylymyq» sáýlesinde, sol sáýleden qýattanǵan jeltoqsan rýhynda kez kelgen syn-qaterge tótep beretin myńjyldyq erik-jigerimiz ben jasampaz senim men úmitimiz tur.
Abaı – danalyq bıigi. Abaı – eldiktiń temirqazyǵy. Prezıdentimiz aıtqandaı, Abaı – rýhanı reformator.