ORAL. 12 maýsym. Batys Qazaqstan oblysy Bórli aýdanynda polıseılerge 40 myń teńge kóleminde para usynǵan brakonerge qatysty sot úkimi shyqty. Soǵan sáıkes, zańsyz balyq aýlaǵan azamat 800 myń teńge aıyppul tóleıtin boldy. Bul týraly Batys Qazaqstan oblystyq prokýratýrasynyń baspasóz qyzmetine silteme jasaǵan egemen.kz tilshisi habarlady.
Oqıǵanyń mán-jaıyn qysqasha aıtar bolsaq, sáýir aıynyń 18-inen 19-yna qaraǵan túni Bórli aýdanynyń tártip saqshylary A.Slıvnoı esimdi azamatty ustaıdy. Onyń kóligin tintý barysynda balyq aýlaıtyn aý men 130 kg. móńke balyq (karas) tárkilenedi. Osy iske baılanysty Bórli aýdandyq ishki ister bóliminde hattama toltyrý kezinde ustalǵan azamat polısııa qyzmetkerlerine para usynǵan.
Prokýratýranyń habarlaýynsha, polıseıler A.Slıvnoıǵa para berýdiń qylmys ekenin eskertken. Soǵan qaramastan, ol óziniń qylmystyq áreketin toqtatpaı, qyzmettik ústel ústine 40 000 teńge qoıǵan. Nátıjesinde brakoner qylmys ústinde ustaldy.
Sottyń úkimimen Slıvnoı Qylmystyq kodekstiń 367-baby, 1-tarmaǵy boıynsha kináli dep tanylyp, oǵan bergen parasynan 20 ese kóp mólsherde, ıaǵnı, 800 myń teńge aıyppul salyndy. Sondaı-aq, ómir boıyna memlekettik organdarda jumys isteý quqynan aıyryldy. Alaıda, kináliniń múlki tárkilengen joq.
Temir Qusaıyn.
Derek: egemen.kz.
Sýret: softcraze.com.