Mańǵystaý aýdanyndaǵy Tıgen, Tasmuryn aýyldarynyń jeri – mal baqqan sharýaǵa, egin ekken baǵbanǵa qolaıly óńir. Turǵyndardyń basym kóbi turmys qamymen ortalyqqa kóshkenmen, sharýashylyǵyn júrgizip otyr. Mal basyn arttyryp, tabysyn eselep otyrǵan otbasylar az emes. Shaǵyn aýyldyń ózekti máselesi de jetkilikti. Ásirese aýylǵa gaz tartý turǵyndar tarapynan uzaq jyl boıy aıtylyp júrgen bolatyn.
Qazirgi tańda atalǵan aýyldarǵa gaz qubyrlaryn tartý jumystary bastaldy. Atalǵan gaz qubyry qurylysy Mástek jerindegi gaz taratý pýnktinen (GRP) bastaý alady. Tartylatyn gaz qubyrynyń jalpy uzyndyǵy 50 shaqyrym, jumystyń quny 1 mlrd 111 mln teńge, onyń ishinde 992 mln teńge respýblıkalyq bıýdjetten bólindi.
«Jumysty merdiger «SMK-4» jaýapkershiligi shekteýli seriktestigi mekemesi júrgizip jatyr. Búgingi tańda 12 shaqyrym jerasty shuńqyry qazylyp, 5,2 shaqyrym turba qubyry kómilgen. Qarjy tolyq bólingende jumysty ýaqytyly aıaqtaıtyn bolamyz, deıdi «SMK-4» jaýapkershiligi shekteýli seriktestigi kompanııasy dırektorynyń orynbasary Aıdar Qurymbaev.
Jalpy, Mańǵystaý aýdanyndaǵy gaz qubyry 971 shaqyrymdy quraıdy. «SMK-4» seriktestigi byltyr bastaǵan Otpan aýyldyq okrýgine qarasty 15 beketke 28 shaqyrym gaz qubyryn júrgizý jumysy jaqynda aıaqtalady. Bul jumystar aıaqtalǵan soń aýdanǵa tolyq gaz berý jumysy máresine jetedi.
Kógildir otynnyń kelýi endi tıgendikter buryn egin egýge qoldanǵan sýly, nýly aýmaqtarda jylyjaılar salyp, ónim óndirýge múmkindik beretin bolady.
Mańǵystaý oblysy