О́skemenge Shyǵys Qazaqstan óńirimen irgeles Reseı Federasııasynyń Altaı aımaǵynan birqatar baıqaýshylar toby kelgen bolatyn. Barnaýl qalasynan kelgen halyqaralyq baıqaýshylar Prezıdent saılaýyn baqylaý barysynda atalǵan saıası oqıǵanyń elimizdiń yntymaǵy men birligin taǵy bir pash etip jatqanyn erekshe atap ótti. Biz TMD baıqaýshylar mıssııasynyń ókili Petr Frızendi sózge tartqan edik.
– Men oblys ortalyǵynda tańerteńnen beri birqatar saılaý ýchaskesin araladym. Barlyq ýchaskelerdegi uıymdastyrýshylar qyzmeti, ondaǵy daýys úderisin júrgizýge jasalǵan jan-jaqty daıyndyq maǵan erekshe áser qaldyrdy. Ekinshiden, biz saılaý ýchaskelerindegi komıssııa ókilderiniń saılaýdy ótkizýge tyńǵylyqty daıyndyqtary barlyǵyn baıqadyq. Olarmen áńgimelesý barysynda qandaı da bir kóńil tolmaýshylyq, kózderine túsken quqyq buzýshylyqtar týraly suradyq. Ondaı keleńsiz oqıǵa tirkelmegen eken. Kandıdattardyń senimdi ókilderimen de sóılestik. Olar da daýys berý úderisi barlyq zań talaptaryna saı ótip jatqanyn atap ótti.
Shyǵys Qazaqstan óńiriniń turǵyndarynda úlken birlik, uıymshyldyq bar ekenin baıqadym. О́ıtkeni, tańerteń saılaý ýchaskeleriniń aldy tolyp turdy. Halyq kezek-kezegimen daýys berip jatty. Bul qazaqstandyqtardyń óz keleshekterine jaýapkershilikpen qaraıtynyn, azamattyq turǵydan belsendi ekendigin kórsetedi. Sonymen birge, búkil otbasymen, bala-shaǵasymen kelip jatqan turǵyndardy kórgenimde, Qazaqstan Respýblıkasynyń Prezıdentin saılaý eldegi mańyzdy oqıǵalardyń biri ǵana emes, saltanatty merekelerden de kem túspeıtinin ańdadym. Kóptegen ýchaskelerde konsert uıymdastyrylyp, saýda-sattyq alańdary jumys istep jatyr. Sondyqtan, saılaýda merekede júrgendeı jaqsy áser aldyq. Halyq jaıdary, kóńildi keıpimen bizge de qýanysh syılady.
Jazyp alǵan
Dýman ANASh,
«Egemen Qazaqstan».