Segizinshi shaqyrylymdaǵy Parlamenttiń úshinshi sessııasynyń ashylýynda Prezıdent el halqyna dástúrli Joldaýyn arnady. Joldaýda nazarǵa alynǵan máseleler men basymdyqtar el ómiriniń barlyq salasyna tıesili ekendigimen este qaldy.
Memleket basshysy Joldaýda atap ótken negizgi 9 strategııalyq baǵytta aqsha-nesıe saıasaty men fıskaldy saıasattyń arasyndaǵy úılesimsizdikti joıý, ınvestısııalyq ahýaldy jáne bıznes júrgizýge qajetti jaǵdaıdy jaqsartý jolynda úzdiksiz jumys isteý, elimizdiń ónerkásip áleýetin tolyq paıdalaný úshin jan-jaqty sharalar qabyldaý, ınfraqurylymǵa qatysty ózekti máselelerdi sheshý, elimizdiń kadrlyq áleýetin birtindep arttyrý, ult saýlyǵyn nyǵaıtý úshin keshendi sharalardy qolǵa alyp, halyqty áleýmettik qoldaý júıesin jańǵyrtý, ekologııalyq ahýaldy jaqsartý, memlekettik basqarý isiniń tıimdiligin barynsha arttyrý, sondaı-aq qoǵamda zań men tártip ıdeologııasyn tereń ornyqtyrý jaıynda keń kólemdi bastamalaryn ortaǵa saldy.
Bul baǵyttar boıynsha atqarylýy kózdelgen jumystardyń deni keıingi bes jylda elimizde qolǵa alynǵan aýqymdy reformalyq saıasattyń jalǵasy sanalady. Atqarylǵan júıeli jumystyń nátıjesinde tıisti alǵysharttar jasaý arqyly osy strategııalyq baǵyttardy júzege asyrý múmkindigi týdy.
Joldaý barysynda atalǵan tezısterdiń arasynan AES salý boıynsha referendým merziminiń anyqtalǵany eń mańyzdy sheshim bolǵany anyq. Dese de, elimizdiń energetıkalyq qaýipsizdigin AES salý arqyly sheshýdiń durys-burysyn otandastarymyz keıingi bir jyl boıy qyzý talqylap keldi. Endi sheshim qabyldaý kezeńi týdy. Bul tańdaý arqyly halqymyzdyń aýyzbirshiligi aıqyn kórinerine senimdimin.
Memleket basshysynyń osy turǵydan: «Bizdiń uzaq merzimge arnalǵan damý jolymyz aıqyn. Bıik maqsattarymyz bar. Oǵan jetý úshin, eń aldymen, el birligin saqtaı bilýimiz kerek. Bir-birimizge qoldaý bildirip, qurmet kórsetýimiz qajet», dep atap ótýi beker emes.
Álisher SATVALDIEV,
Senat depýtaty