Astanada kúreń kúz bastaldy. Qazirgi aýa temperatýrasynyń ortasha kórsetkishi +15°C bolsa da, nóser jaýyn jıi jaýyp jatyr. Osy oraıda turǵyndar kókeıinde jylý berý maýsymy qashan bastalady degen saýal týyndaǵany anyq. Biz bul suraqty qala ákimdiginiń ókilderine qoıdyq, dep jazady Egemen.kz.
Ákimdik aýa temperatýrasy 5 kún qatarynan +10 gradýstan tómen bolǵanda ǵana jylý qosylatynyn málimdedi.
«Astana qalasy máslıhatynyń sheshimimen bekitilgen Astana qalasyndaǵy jylytý maýsymyna daıyndalý jáne ótkizý qaǵıdalaryna sáıkes, elordada jylytý maýsymy syrtqy aýanyń belgilengen ortasha táýliktik temperatýrasy bes táýlik ishinde +10°S jáne odan tómen bolǵanda bastalady», delingen ákimdik jaýabynda.
Aıta keteıik, «Qazgıdromet» RMK usynǵan aýa raıy boljamyna súıensek, aldaǵy 10 kúnde aýa temperatýrasy +10 gradýstan tómendemeıdi.