Prezıdent Qasym-Jomart Toqaevtyń «Ádiletti Qazaqstan: zań jáne tártip, ekonomıkalyq ósý, qoǵamdyq optımızm» atty halyqqa Joldaýyn asa yntamen tyńdadyq. Biz Memleket basshysynyń ádiletti qoǵam qurýǵa jáne eldi damytýǵa baǵyttalǵan saıasatyn tolyq qoldaımyz.
Memleket basshysy Joldaýynda orta bilim máselelerine erekshe nazar aýdardy. Ulttyq joba «Jaıly mektep» aıasynda 2025 jyldyń sońyna deıin 217 zamanaýı mektep salý josparlanǵan, olar zamanaýı tehnologııalarmen jáne joǵary jyldamdyqty ınternetpen jabdyqtalady. Bul – oqýshylar men muǵalimderge qolaıly jaǵdaı jasaıdy. Búkil el boıynsha 1 300 mektepke kúrdeli jóndeý júrgizilip, myńdaǵan balaǵa arnalǵan oqý jaǵdaıy jaqsaratynyna senimimiz mol. Sonymen qatar Prezıdent muǵalimderdi qoldaý mańyzdylyǵyn atap ótip, bıylǵy oqý jylynda pedagogter men oqytýshylardyń jalaqysy ósetinin aıtty. Bul – ustazdyq qyzmettiń bedelin arttyrýǵa jáne bilim berý salasyna jas mamandardy tartýǵa baǵyttalǵan, elimizdiń bolashaǵy úshin óte mańyzdy sheshim. Memleket basshysy bilim berý júıesinde zamanaýı tehnologııalardy engizý, bilim mekemeleriniń ınfraqurylymyn jaqsartý jáne pedagogterdiń biliktiligin arttyrý qajettigin atap ótip, tek birlesken kúsh-jiger arqyly ǵana biz osy mańyzdy salada eleýli jetistikterge jete alatynymyzdy jetkizdi.
2023–2024 oqý jylynda 1 642 oqýshy 31 halyqaralyq olımpıadalar men konkýrstarǵa qatysyp, 473 medal jeńip aldy. Naqtyraq aıtsaq, qanjyǵamyzda 58 altyn, 169 kúmis jáne 246 qola, 51 gramota bar. Bilim básekeleriniń ishinde 7 bedeldi álemdik olımpıada erekshe nazar aýdarýǵa laıyq. Búgingi kúni oqýshylar eń aýqymdy «IMO», «IPhO», «IBO», «IOL», «IShO», «IGeO» alty halyqaralyq olımpıadalarǵa qatysyp 2 altyn, 9 kúmis, 11 qola, 1 gramotaǵa ıe boldy.
Sondaı-aq Joldaýda sıfrlandyrý máselelerine de úlken mán berildi. Prezıdent Astanada jasandy ıntellektiniń Ulttyq ortalyǵyn qurý týraly jarııalap, bul jańa býyn mamandaryn daıarlaýda mańyzdy qadam bolatynyn ashyq aıtty. Bul bastamalar sıfrlyq ınfraqurylymdy damytýǵa jáne el azamattaryna jańa múmkindikter jasaýǵa baǵyttalǵan. Biz bilim berý júıesinde berilgen múmkindikterden shabyt alyp, osy mańyzdy jobalardy júzege asyrýǵa óz úlesimizdi qosýǵa daıynbyz.
Ǵajdembek TURSYNOV,
«Daryn» respýblıkalyq ǵylymı-praktıkalyq ortalyǵynyń dırektory