Burnaǵy kúni Qýanysh Sultanovtyń tóraǵalyǵymen Prezıdent janyndaǵy Adam quqyqtary jónindegi komıssııanyń keńeıtilgen otyrysy ótti. Onda Ishki ister mınıstrliginiń Qazaqstandaǵy adam saýdasyna qarsy is-qımyl salasyndaǵy atqaryp jatqan qyzmeti talqylandy. Bul másele boıynsha Ishki ister mınıstri Qalmuhanbet Qasymov baıandama jasady.
Komıssııa músheleri ǵalamdyq aýqymdaǵy problema – adam quqyǵyn buzýdyń eleýli túri bolyp tabylatyn jáne ulttyq shekarany tanymaıtyn adam saýdasyna erekshe kóńil bóldi. Qazaqstanda adam saýdasymen kúres úshin halyqaralyq standarttarǵa sáıkes keletin zańnamalyq baza qurylǵany atap ótildi.
Qazaqstan Respýblıkasy adam quqyqtary salasyndaǵy 60-tan astam kópjaqty ámbebap sharttardyń qatysýshysy bolyp tabylady, osynyń ishindegi 15 halyqaralyq konvensııalar, sharttar jáne kelisimder quldyqtyń qazirgi zamanǵy nysandaryna qarsy is-qımylmen tikeleı baılanysty. Buǵan qosa, Adam quqyqtary jónindegi komıssııanyń «Qazaqstan Respýblıkasyndaǵy adam saýdasyna qarsy is-qımyl salasyndaǵy adam quqyqtaryn qorǵaýdyń ózekti problemalary» atty arnaıy baıandamasynyń usynymdaryn oryndaý maqsatynda ýákiletti memlekettik organdar adam saýdasynyń qurbandaryna arnaıy áleýmettik kómek kórsetýdiń úlgisin ázirledi. Bul úlgi 2016 jyldan bastap qanatqaqty rejimde Qostanaı, Ońtústik Qazaqstan oblystarynda, Astana jáne Almaty qalalarynda engiziletin bolady.
Sóz sóılegender memlekettik jáne quqyq qorǵaý organdarynyń úkimettik emes uıymdarmen adam saýdasyna baılanysty quqyq buzýshylyqtardyń profılaktıkasy men trafık qurbandaryna arnaıy áleýmettik qyzmet kórsetý salalaryndaǵy ózara is-qımyldaryn kúsheıtýge erekshe nazar aýdardy. Komıssııanyń otyrysynda ázirlengen usynymdar Memleket basshysynyń, Qazaqstan Respýblıkasy Parlamenti men Úkimetiniń nazaryna usynylady.
«Egemen-aqparat».