ASTANA. 13 maýsym. Belgili eks-velosportshy, dopıng qoldanǵany úshin ómir boıyna sporttan alastatylǵan Lens Armstrong 100 mln. dollarynan aıyrylyp qalýy múmkin. Bul týraly eurosport.ru habarlady.
Qazirgi tańda Armstrong US Postal velokomandasynda birge saıysqa túsken áriptesi Floıd Lendıspen jáne AQSh úkimetimen sottasýda. Eger sot sheshimi boıynsha burynǵy sportshy jeńiletin bolsa, barlyq dúnıe-múlkinen aıyrylady.
Cycling Weekly basylymyna bergen suhbatynda ol: «Eger bul iste jeńiletin bolsam, biz budan bylaı dál osylaı meniń úıimde emin-erkin áńgimelesip otyra almaımyz. Tipti ol kezde meniń úıim de bolmaıdy. Sebebi, sotta jeńilsem men 100 mln. dollary bar adamdardyń qatarynda bolmaımyn», – dedi.
Sondaı-aq, Armstrong barlyq jankúıerinen keshirim surady. «Men maǵan sengen, jankúıer bolǵan, qoldaý bildirgen, qandaı jaǵdaı bolsyn qorǵaǵan adamdardyń bárinen keshirim suraımyn. Olardyń sonshalyqty yqylastaryn bile tura, sońynda bárin satyp kettim. Bul isim úshin qatty ókinemin. Eger ár jankúıerime baryp, jekeleı keshirim suraý múmkin bolsa, dál solaı jasar edim», – deıdi ol.
Lens Armstrong dopıng daýyna deıin velosporttaǵy dańqty sportshylardyń biri boldy. «Týr de Frans» kópkúndigin jeti márte jeńip alǵan ol dopıng qoldanǵanyn moıyndaǵannan keıin barlyq ataq-dańqynan aıyrylǵany belgili.
Aıbek Moldabaev.
Derek, sýret: eurosport.ru.