Jańa oqý jyly bastalysymen Mańǵystaý oblysynyń Munaıly aýdanyndaǵy bir mektepte keleńsiz oqıǵa boldy. 6 qyrkúıek kúni keshke atalǵan aýdandaǵy №8 mekteptiń 21 oqýshysy ishiniń aýrýy, dene qyzýy kóterilýine baılanysty jedel járdem shaqyrta bastaǵan. Bir táýlik ishinde, ıaǵnı 7 qyrkúıek kúni keshke deıin medısınalyq kómekke 67 bala júgingen bolsa, onyń ishinen 52 bala úı jaǵdaıyna baqylaýda qaldyrylyp, 13 bala aýrýhanaǵa jatqyzylǵan.
Oqıǵaǵa baılanysty Mańǵystaý oblystyq ákimdik janynan jedel shtab qurylyp, qarqyndy jumysqa kiristi. Densaýlyq saqtaý basqarmasy tarapynan shaqyrtýlarǵa dereý qyzmet kórsetýge oblystyq jedel jáne shuǵyl medısınalyq kómek stansasynyń 12 negizgi jáne 4 qosymsha brıgadasy jumys istese, Munaıly ortalyq aýdandyq aýrýhanasynyń shaqyrýlarǵa qyzmet kórsetýdiń 4 sanatty 4 brıgadasy jáne Aqtaý qalasynyń 4 sanatty 7 brıgadasy jumyldyryldy. Sondaı-aq oblystaǵy emhanalardyń psıhologter toby ata-analar men balalarǵa qajetti kómek kórsetýge kiristi.
Aýrýhanaǵa arnaıy barǵan óńir basshysy Nurdáýlet Qılybaı oblystyq aýrýhanada jatqan oqýshylardyń jaı-kúıin kórip, ata-analaryna balalarynyń tezirek saýyǵyp ketýin tiledi jáne sala, aýrýhana basshylaryna ýlanǵan balalarǵa qajetti barlyq kómekti kórsetýdi, aýrýhanadaǵy jumys kestesin kúsheıtýdi tapsyrdy. Jeksenbi kúni 300-ge jýyq bala óz úıinde dáriger qadaǵalaýynda qaldyrylyp, 67 bala aýrýhanaǵa jatqyzyldy, al jaǵdaıy aýyrlaý eki bala jansaqtaý bólimine ornalastyryldy.
– Aýrýhanada tıisti em-dom kórsetilip jatyr. Dári-dármek pen tósektik oryndar jetkilikti. Dál qazir eń bastysy – oqýshylardyń densaýlyǵy. Naýqastardyń tez jazylyp ketýine barlyq jaǵdaıdy jasaýymyz qajet. Keıin osy jaǵdaıǵa baılanysty tıisti sharalar men sheshimder qabyldaımyz, – dedi Nurdáýlet Qılybaı.
Atalǵan oqıǵa boıynsha Munaıly aýdandyq PB-niń SDTBT-ne QR QK-niń 304-baby 1-bóligimen №244750031000356 qylmystyq is tirkelip, sotqa deıingi tergep-tekserý jumysy bastaldy. Sondaı-aq jaǵdaıdyń sebebin anyqtaý maqsatynda Mańǵystaý oblysynyń sanıtarlyq-epıdemıologııalyq baqylaý departamenti de tekseris júrgizýge kiristi.
Jeksenbi kúni keshke Mańǵystaý oblystyq densaýlyq saqtaý basqarmasy basshysy Bekbolat Izbasarov densaýlyǵy jaqsarǵan birqatar balanyń úıine qaıtarylyp jatqanyn habarlady. Basqarma basshysynyń aıtýynsha, Munaıly aýdanynda mektep ashanasynda tamaqtan ýlanǵan balalardyń jaǵdaıy jaqsaryp keledi. Jalpy, ahýal turaqtanǵan. Oblystyq aýrýhananyń jansaqtaý bóliminde jatqan eki balanyń beti beri qaraǵan. Búgin-erteń jalpy palataǵa aýystyrylýy múmkin.
– Der kezinde bastalǵan emniń septigimen balalardyń ómirine qaýip joq. Barlyq qajetti medısınalyq kómek kórsetilip jatyr. Tósektik oryn men dári-dármek qory tolyqtaı jetkilikti, – dedi B.Izbasarov.
Quzyrly oryndardyń qatysýymen oqıǵanyń sebebi anyqtalyp, naqty málimet habarlanady.
Mańǵystaý oblysy