Orman sharýashylyǵynyń negizgi salalarynyń biri – qaǵaz-sellıýloza ónerkásibi. Keıingi jyldary osy salanyń ekonomıkalyq áleýeti paıdalanylmaı jatqany belgili. Bıyl osy olqylyqtyń orny tolyp, sellıýloza-qaǵaz ónerkásibine erekshe kóńil bólinbek. Elimizde jalpy quny 11,1 mlrd teńge bolatyn 7 joba iske qosylyp, 215 jańa jumys orny ashylady.
Aldaǵy ýaqytta kásiporyndar maılyq, dárethana qaǵazy, dymqyl maılyq, dápter, karton jáne gofrlengen qaptamalar shyǵaratyn bolady. Barlyq ónim eldiń ishki qajettilikterine baǵyttalady. Búgingi kúnge josparlanǵan 7 jobanyń ekeýi Shymkent qalasynda iske qosyldy. Olar – dymqyl maılyq pen PKS markaly karton óndiretin kásiporyndar. Buǵan salynǵan ınvestısııanyń jalpy somasy 300 mln teńgeni qurap, 40 jańa jumys orny quryldy.
Osy jylǵa josparlanǵan barlyq óndiris kólemi shamamen 20 mlrd teńgeni quraıdy. Olardyń ishinde dymqyl maılyq, maska, jeke qorǵanys quraldary, karton qaǵaz jáne gofrlengen karton óndirisi bar. Bul nysandardyń ashylýy 300 jumys ornyn qurýǵa múmkindik beredi. Jańa kásiporyndar óniminiń 20%-dan astamyn jaqyn jáne alys shetelderge eksporttaýdy josparlap otyr. Bul kásiporyndardyń basym kópshiligi Shymkent jáne Almaty qalalarynda ornalasqan.
Jobalardy iske asyrýǵa monıtorıng júrgizý, taldaý dıreksııasy atap ótkendeı, aldaǵy ýaqytta salada quny 35 mlrd bolatyn 500-den astam jumys ornyn qurýmen qatar taǵy 9 joba pysyqtalyp otyr. Otandyq jáne sheteldik ınvestorlarmen birlesip maılyq, jumyrtqa naýasy, gofrotara, qaǵaz qaptar óndirisin iske qosý josparlanǵan.
«Jalpy, sellıýloza-qaǵaz ónerkásibiniń ınvestısııalyq portfel quny 57,6 mlrd teńge bolatyn 25 jobany qamtıdy. Olardy iske asyrý 1,1 myń jańa jumys ornyn qurýdy kózdeıdi», delingen «QazIndustry» AQ Jobalardy iske asyrýǵa monıtorıng júrgizý, taldaý dıreksııasy habarlamasynda.
Aıta keteıik, salaǵa ınvestısııa tartý maqsatynda respýblıkalyq jáne jergilikti deńgeılerde arnaıy-ekonomıkalyq aımaqtar sheńberinde ınvestısııalyq preferensııalar, nesıeleýdiń jeńildikti sharttary, salyqtyq jeńildikter túrinde memlekettik qoldaýlar kórsetiledi.