El tutastyǵynyń tutqasy

Elimizde birligimiz ben yntymaǵymyzdy kórsetetin, erteńge degen senimdi nyǵaıtatyn, keshe men búgindi sabaqtastyra otyryp, bolashaqqa qaraı nyq qadam basýǵa jiger beretin irgeli ister jetkilikti. Olardyń barlyǵyn tizbektep shyǵý uzaq ári taýsylmaıtyn áńgime. Ásirese, sońǵy kezderi qolǵa alynǵan qyrýar jumystar elimizdiń bıik belesterge kóterilýine, jańa sıpatta damýyna zor yqpalyn tıgizip otyrǵanyna eshkim daý aıta qoımas. Qazaqstannyń ishki tutastyǵy, aýyzbirshiligi talaıdyń aýzynda júr. Bul ózgeler úlgi tutar jasampaz isterdiń qaınar kózine aınalǵan jurtymyzdyń áleýetine qyzyǵa ári qyzǵana qaraıtyndar qatary kún ótken saıyn kóbeıip kele jatqanyn bildirse kerek. Kúni keshe, ıaǵnı, prezıdenttik saılaý ótken 26 sáýir kúni álem halqy yntymaqty tý etip, tuǵyrynda tulǵalana túsken, tatýlyǵyn myzǵymastaı etip bekitip, berekesin birlikten tapqan el ekenimizge taǵy bir ret kóz jetkizdi. Halyq oıynyń óz Kóshbasshysyn tańdaý sátinde bir núktede toǵysýy jaqsylyqtyń belgisi, eldik sananyń óskeni, irgeniń nyǵaıǵany, shańyraqtyń bıikteı túskeni. Negizinde, el yntymaǵyn aıǵaqtaıtyn nyshan kóp. Al sonyń ishindegi jol bastar azamatyn qapysyz tanyp, oǵan dáýlet tizginin usynýda uıymshyldyq tanyta bilý isi birliktiń shynaıy sıpatyn kórsetedi. Keshe Astana tórindegi «Saryarqa» velotreginde Memleket basshysy Nur­sultan Nazarbaevtyń qatysýymen «Jeńim­pazdar forýmy» boldy. Onyń ne úshin ót­kizilgenin táptishtep túsindirip jatý ar­tyq shyǵar. Degen­men, sharanyń kezek­ten tys prezı­dent­tik saılaýda jeńis­ke jetken Elba­sy Nursultan Na­zarbaev­qa qoshemet kór­setý maqsatynda uıym­das­­ty­ryl­ǵanyn aıta ketelik. Jıyn barysynda qazaqstandyq estrada juldyzdary konsert berdi. Elbasyna degen ystyq yqylastaryn bildirý úshin velotrekke 8 myńnan astam adam jınaldy. Olardyń arasynda belgili qoǵam jáne mádenıet qaıratkerleri, tanymal sportshylar, zııaly qaýym ókilderi jáne qarapaıym azamattar boldy. Jalpy, bul sharaǵa qatysqan jurt­shy­lyq «Jeńimpazdar forýmynyń» ótki­zilýin saılaýda baǵy janǵan Elbasy men onyń komandasyna ǵana emes, sonymen qatar, barsha qazaqstandyqtardyń jeńisi qurmetine baǵyttalǵanyn uǵa bildi. Taǵy bir erekshe iltıpatpen atap óter jaıt, forýmǵa aqjarma kóńilmen, shynaıy nıetpen kelgen halaıyq kúni keshe ótken saılaýda Qazaqstan halqy jarqyn bolashaqqa bastar joldy jańylyspaı tańdaǵanyn, durys sheshim qabyldaǵanyn, qıys pıǵylǵa jol berilmegenin shynaıy peıilderimen aıtýmen boldy. Qoshemetke bólengen Memleket basshysy jurt aldynda óziniń rııasyz kóńilinen shyqqan alǵysqa toly, mándi de mańyzdy sózin arnady: – Qurmetti halqym! Qazaqstandyqtar! Búgin elimiz úshin taǵy bir umytylmas tarıhı kezeń jazyldy. О́zderińizge belgili, jańa ǵana Ortalyq saılaý komıs­sııasy málimdeme jasady. Elimizdiń 95 paıyzdan artyq saılaýshylary qatys­qan sharada halyq maǵan 97,7 paıyz daýys berdi. Eń birinshi alǵysym – halqy­ma. Osy jyldardyń barlyǵynda meni qol­dap, sońymnan erip, shylbyr men tizgindi bir qolyma ustatyp, senip kele jat­qan otandastarymnyń jappaı senimin oryndaý –  qadirmendi mindet. Osy mindetti atqarý úshin ózimniń kúsh-jigerimdi, densaýlyǵymdy, tájirıbemdi aıamaı qyzmet etýge ant bergenmin. Men sol antty oryndap kele jatyrmyn, – dedi Prezıdent Nursultan Nazarbaev. Sondaı-aq, Elbasy saılaýdy ót­ki­zýde belsendilik tanytqan «Nur Otan» partııa­synyń, Qoǵamdyq komıs­sııanyń, 10 myń­nan astam shtab­tyń múshelerine alǵysyn jetkizdi. – Olar meniń baǵdarlamamdy halyqqa túsindirdi. Barshalaryna shyn júrekten alǵys aıtamyn. Belsendi qatysqan jastarǵa da rızashylyǵymdy bildiremin. Barlyq atqarylyp jatqan sharýany Qa­zaqstannyń bolashaǵy myǵym, Táýel­siz­digimizdiń tuǵyry bıik bolýy úshin, máń­gilik bolýy úshin istep jatyrmyz. Bul – jastar úshin, bolashaq úshin kerek. Olar Otanyn súıip, eli úshin qyzmet ete­di dep senemin, – dedi Memleket basshysy. Sonymen qatar, Prezıdent Nur­sul­tan Nazarbaev barsha qazaq­stan­dyqtarǵa saılaýdaǵy qoldaýy úshin alǵysyn bildirdi. – Búkil Qazaqstan keshe bir kisi­deı daýys berýge keldi. Men azamat­tardyń otbasylarymen, balalarymen, nemerelerimen saılaý ýchas­kelerine kelgenin kórdim. Bul maǵan úlken jaýapkershilik júkteıdi, hal­qy­myz óziniń turmysyn, ál-aýqatyn jaqsartyp, balalaryn tárbıeleýi jáne bolashaqqa senimmen qaraýy úshin ne isteý kerektigi týraly kúni-túni oılanýǵa májbúrleıdi, – dedi Elba­sy. Memleket basshysy el halqynyń saılaýǵa qatysý arqyly Prezıdentke ǵana emes, óz bolashaǵyna da daýys bergenine, tutastyǵy men birli­gin, demokratııalyq tuǵyryn, saıa­sı mádenıetin taǵy bir márte pash etke­nine, sonymen qatar, shetelder­degi Qa­zaqstannyń dostary óz ıgi tilek­terin aıtyp, qoldaýlaryn bildirip jatqanyna nazar aýdardy. – Biz dúnıejúziniń aldynda taǵy da bir márte ózimizdiń demokratııalyq tuǵyrymyzdy, saıası mádenıetimizdi kórsettik. Dúnıejúzinen kelgen 850-den astam baıqaýshy, 40 elden 170 jýr­­nalıst osy saılaýdy baıqady, so­lar­dyń aldynda Qazaqstannyń birli­­gin, senimin, Qazaqstannyń ishki tatý­ly­ǵyn pash ettik, – dedi N.Nazar­baev. Memleket basshysy saılaýdan keıin aýqymdy jumys kútip turǵa­nyna toqtala kelip, «Nurly Jol» mem­lekettik baǵdarlamasyn júzege asy­ryp, búkil Qazaqstan boıynsha jol­­dar jelisin salyp, sapaly avtokó­lik jáne temirjoldardy, elektr je­li­­lerin iske qosý qajettigine toqtal­dy. – Saılaý sharalary aıaqtaldy. Endi naqty jumystardyń kezegi keldi. Biz atqaratyn jumystarymyzdy bile­miz. Saılaý aldyndaǵy naýqan bary­synda men usynǵan reformalar­dy túsindirý júrgizildi. Biz Qazaq­standy ındýstrııalandyrýdy aıaǵyna jetkizýge, balama ekonomıka qa­lyp­tastyrýǵa, sapaly tabys jáne kásibı bilik­tilikpen baılanysty jańa jumys oryndaryn ashýǵa tıispiz. «Nur­ly Jol» baǵdarlamasyn júzege asyryp, ekonomıkalyq baılanystarymyzdy belsendilendirýimiz  jáne tranzıtti memleketke aınalý úshin búkil Qazaqstandy joldarmen qamtýymyz kerek. Osynyń bári – jańa kezeń, siz ben biz atqarýǵa tıisti aýyr jumys, – dedi ol. Budan bólek, Prezıdent óziniń bes jańa ınstıtýttyq reformany usynǵanyn, osynyń negizinde bıznestiń erkindigi qamtamasyz etiletinin, eshkim de jekemenshikke kúdik uıalatpaýy tıis ekenin aıta kelip, «Bul – jańa kezeń, aldaǵy kúrdeli jumystardy barsha halyq birge eńserýi tıis. Men sizderge jańa maqsat­tardy iske asyrýda tabystar tileımin», – dedi. Sondaı-aq, Elbasy ishki jáne syrtqy saıasattaǵy negizgi ba­sym­­­dyqtardyń saqtalatynyn, serik­tes memlekettermen dostyq qa­rym-qaty­nastardy damyta berý  kún tárti­binen túspeıtinin jetkizdi. – Biz ishki tatýlyqty saqtaımyz, sondaı-aq, odaqtastarymyz ben serik­testerimizdiń aldyndaǵy min­det­­te­melerimizge adal bolamyz. О́z ishimizdegi kelisimdi nyǵaı­typ, bizdiń óńirdegi jáne búkil plane­tadaǵy beıbitshilikke atsalysamyz. Bizge senedi, sondyqtan biz qaqty­ǵys bolǵan jerdiń bárinde qantógis­ti toqtatýǵa úndeımiz. Biz kópkonfessııaly jáne kópetnosty eldiń tatý ómir súre alatynyn kórse­tip otyrǵan Qazaqstannyń tájirı­besine qaraýǵa shaqyramyz, – dedi Memleket basshysy. Aıtýly jıyn sońynda Nursultan Nazarbaev prezıdenttik saılaýdy uıymdastyrýǵa jáne ótkizýge belsene qatysqan barshaǵa taǵy da alǵys aıta otyryp, qazaqstandyqtarǵa amandyq-saýlyq, elimizge tatýlyq pen tynyshtyq, bereke tiledi. Joldybaı BAZAR, «Egemen Qazaqstan».