Keshegi ótken baspasóz máslıhatynda Ortalyq saılaý komıssııasynyń tóraǵasy Qýandyq Turǵanqulov Prezıdent saılaýynyń aldyn-ala qorytyndylaryn jarııalady. Ol boıynsha Qazaqstan halqynyń 95,22 paıyzy saılaýǵa kelip, daýys bergen.
Memleket basshysyn saılaýǵa elektorattyń óte belsendi túrde qatysqanyn Q.Turǵanqulov aıryqsha atap ótti. «Egemen Qazaqstan tarıhynda birinshi ret saılaýshylar ózderiniń azamattyq ustanymyn, elektorattyq belsendiligin jáne eldiń bolashaǵy úshin saıası jaýapkershiligin aıqyn kórsetti. Osyǵan, sondaı-aq, saılaý naýqanyn uıymdastyrý deńgeıiniń artqanyna birinshi kezekte baıqaýshylar men sarapshylar ózderiniń túsiniktemelerinde kóńil aýdardy», dedi tóraǵa.
Munymen qatar ol oblystyq, Astana jáne Almaty qalalyq saılaý komıssııalarynan kelip túsken jedel derekter negizinde saılaýdyń aldyn-ala qorytyndylarynyń anyqtalǵanyn da jetkizdi. Ondaǵy aqparatqa zer salsaq, Ortalyq saılaý komıssııasyna sol ýaqytqa deıin kelip túsken saılaýshylar daýysy kelesideı bolypty. Ábilǵazy Qalıaqparuly Qusaıynovqa saılaýshylardyń – 0,7 paıyzy, Nursultan Ábishuly Nazarbaevqa – 97,7 paıyzy, Turǵyn Ysqaquly Syzdyqovqa 1,6 paıyzy daýys beripti.
Osyndaı jaǵymdy jańalyqty jarııalaǵan Ortalyq saılaý komıssııasynyń tóraǵasy, áli de aýmaqtyq saılaý komıssııalary hattamalarynyń kelip túsýine qaraı bul derekter aldaǵy ýaqytta taǵy da naqtylanatynyn táptishtedi. Buǵan zań boıynsha eki kúndik merzim beriledi eken. «Saılaý týraly» Zańǵa sáıkes 26 sáýirde ótken Qazaqstan Respýblıkasynyń Prezıdentin saılaýdyń sońǵy nátıjesin Ortalyq saılaý komıssııasy saılaýdan keıin jeti kún merzimnen, ıaǵnı 2015 jylǵy 3 mamyrdan keshiktirmeı jarııalaýy tıis», dedi Q.Turǵanqulov.
Nurbaı ELMURATOV,
«Egemen Qazaqstan».