1-4 qazan kúnderi Almaty qalasynda ótetin «Mura ınstıtýttary qoǵamdy ornyqty damytý jolynda» II kongresi qarsańynda Prezıdent Arhıviniń 30 jyldyǵyna arnalǵan mereıtoılyq poshta markasy arnaıy tanystyryldy. Saltanatty rásim Prezıdent arhıviniń ǵımaratynda ótti. Arnaýly poshta markasyn tanystyrý rásimine Prezıdent arhıviniń dırektory Álııa Mustafına men «Qazposhta» AQ basqarma tóraǵasy Ásel Janasova qatysty.
Jıynda Prezıdent arhıviniń dırektory Álııa Mustafına sóz alyp, arhıvtiń ótken tarıhy men búgingi ahýaly jóninde atap ótti. Sondaı-aq ol Prezıdent arhıviniń 30 jyldyǵyna arnalǵan mereıtoılyq poshta markasyn shyǵarý bul ótkenge qurmet jáne ony nasıhattaýǵa umtylystyń kórinisi ekenin tilge tıek etti.
«Mereıtoılyq poshta markasyn shyǵarý arhıvtiń «Ulttyq arhıv qory jáne arhıvter týraly» zańynda bekitilgen qujattyq murany qalyptastyrýda ról atqaratyn strategııalyq aqparattyq resýrstardyń biri retindegi erekshe mártebesin kórsetedi», degen Á.Mustafına poshta markasyn shyǵarǵan «Qazposhta» basshysy Ásel Janasova men ujymyna zor alǵysyn bildirdi.
Mereıtoılyq poshta markasyn shyǵarý otandyq arhıvshilerdiń jumysyna degen úlken yqylastyń belgisi deýge bolady. О́ıtkeni otandyq poshta markasy alǵash ret arhıv salasyna arnalyp otyr. Marka 1 qazannan bastap aınalymǵa shyǵady. Jalpy tırajy 5 myń danany quraıdy. Poshta markalaryndaǵy sýretter – mańyzdy tarıhı oqıǵalar men jetistikterdiń shejiresi. Arnaıy mórtabanmen belgilengennen keıin kolleksııalyq qundylyqqa ıe bolady, arhıvte saqtalǵan tarıhı, mańyzdy qujattar sııaqty este qalarlyq nysanǵa aınalady. Prezıdent arhıvine arnalǵan alǵashqy mereıtoılyq marka elimizdiń damý tarıhyn zertteýshiler men fılatelısterdiń toptamalarynda laıyqty oryn alyp, naǵyz sırek kezdesetin qundylyqqa aınalatyny sózsiz.
ALMATY