*Ispanııa aýmaǵyndaǵy NATO áskerı bazasynda grektiń joıǵysh ushaǵy apatqa ushyrady. Ushaq áýege kóterile bere angardyń ústine qulap, jarylǵan. Oqıǵa saldarynan Ispanııaǵa biliktilikterin jetildirýge kelgen 8 fransııalyq áskerı ushqysh pen 2 grekııalyq áskerı ushqysh qaza tapty. Taǵy 13 adam túrli deńgeıde dene jaraqatyn aldy.
* Kúrd kóterilisshileriniń kúshteri Sırııanyń Aın ál-Arab (Kobanı) qalasyn tolyqtaı óz baqylaýyna aldy. Qala túrik shekarasyna jaqyn mańda ornalasqan. Qalany «Islam memleketi» qarýly jasaqtarynan tazartýǵa birneshe aıǵa sozylǵan urys qımyldarynan keıin qol jetip otyr. AQSh-tyń áskerı-áýe kúshteri sırııalyq kúrdterge áýeden qoldaý kórsetken.
* Pákistannyń arnaıy qyzmetteri terrorızmge qatysy bar degen kúdikpen kem degende 9 myń adamdy tutqyndaǵan. Qamaýǵa alynǵandardyń arasynda 3 myńnan astam molda men medrese muǵalimderi, sondaı-aq, 3,5 myńdaı aýǵandyq bosqyn bar. Ustalǵandardyń eń kóbi, ıaǵnı 6702 adam negizinen pýshtýndar turatyn Haıber-Pahtýnhva provınsııasynyń úlesine tıedi.
* 2011 jyldyń qańtarynda jappaı narazylyq sherýleri barysynda taǵynan taıdyrylǵan Mysyr prezıdenti Hosnı Múbáraktiń eki uly túrmeden shyǵaryldy. «Assosheıted Press» agenttiginiń habarlaýyna qaraǵanda, Alıa men Gamal qamaýdan bosatylǵannan keıin el astanasy – Kaır qalasynyń ońtústiginde ornalasqan óz úılerine jol tartypty.
* Kýba revolıýsııasynyń kósemi Fıdel Kastro alǵash ret AQSh pen Kýba arasynda dıplomatııalyq qarym-qatynas qaıta ornaýyna baılanysty túsinik berdi. «Reıter» agenttiginiń habarlaýynsha, ol AQSh prezıdenti Barak Obama men qazirgi Kýba basshysy Raýl Kastro bastaǵan jaqyndasý týraly qadamdardy quptaıtynyn bildiripti. Biraq AQSh saıasatyna senbeıtinin de ashyq aıtqan.
* Reseı Tájikstandaǵy áskerı bazasyn kúsheıtý nıetinde. Mundaı sheshimge taraptar Reseı qorǵanys mınıstriniń orynbasary Anatolıı Antonovtyń Dýshanbege sapary barysynda kelse kerek. Antonovtyń sózine qaraǵanda, Tájikstan qarýly kúshterin nyǵaıtý arqyly Reseı óziniń qaýipsizdigin de nyǵaıta túsedi.
* Argentına prezıdenti Krıstına Fernandes de Kırshner eldiń barlaý vedomstvosyn taratý týraly jospary bar ekenin jarııa etti. Onyń pikirinshe, atalǵan vedomstvo jemqorlyqtyń oshaǵyna aınalǵan. Prokýror Alberto Nısmannyń qazasy syrtynda da agenttiktiń jemqorlyqqa salynǵan qyzmetkerleri turýy yqtımal.
* Amerıkalyq mıllıarder Donald Tramp respýblıkashylar tarapynan prezıdenttik saılaýǵa qaıta túsýge ýáde berip otyr. Men bul laýazymdy atqara alatynyma tolyq senimdimin, deıdi ol. Tramptyń pikirinshe, respýblıkashylar qatarynan basqa laıyqty úmitker kózge kórinip turǵan joq. Tramp 2008 jáne 2012 jyldarǵy prezıdenttik saılaýǵa túsemin dep alyp, artynan taıqyp shyqqan edi.
Aqparat agenttikteriniń materıaldary negizinde ázirlendi.