Qyzyl qyrmanǵa at basyn burdyq. Bıyl astyq mol, halyqtyń da kóńil kúıi kóterińki. Qyrman basyna bir qaýym jurt jınalyp qalypty. Áýeli paı ıeleriniń úlesin taratyp jatqan shyǵar dep oıladyq. Shynynda da solaı eken, árkim óz úlesin alyp jatyr. Tańdaýlaryna oraı. Bireýi bıdaı, bireýi arpa degendeı. Shetkerek turǵan shoqsha saqaldy jigit aǵasy sharýashylyq basshysyna jaǵdaıyn aıtyp jatyr.
– О́zińiz bilesiz ǵoı, taıaýda ǵana kóship keldik. Azyn-aýlaq malymyz bar. Shópti kúzde jınadyq. Nári ketken soń. Endi jemsiz bolmaıtyn túri bar, – deıdi jigit aǵasy.
– Qalaǵanyńyzdy alyńyz, – deıdi sharýashylyq basshysy, – bıyl kókten berip, jerden óndi. Arpa alasyz ba, álde suly alasyz ba, qansha kerek edi?
– Mine, osy jón, – dep áńgimege aralasty shetteý turǵan aqsaqal. – Ertede baýyrmal, bir-birine qamqor el ishinde osyndaı jıyn-terim kezinde aǵaıynǵa kómektesetin keýsen degen dástúr bolǵan. Qazir myna jigitter sol dástúrdiń anyq atyn bile qoımaǵanymen, jalpy nobaıy, ishki mazmuny saqtalyp otyr. «Elde bolsa, ernińe tıedi» degen halqymyzdyń danalyǵy osy emes pe? Jaz boıy kúnniń qabaǵyna qarap el-jurt shópsiz qalmasa eken, kásip qylyp júrgen azamattardyń eńbegi janyp, ekkeni shyqsa eken dep tilek tiledik emes pe?
– Ýa, aqsaqal, kóp tilegen soń, kól bolyp jatqan shyǵar, tıesili sybaǵańyzdyń ústinen taǵy bir tonna alyńyzshy, aq túıeniń qarny jarylyp tur ǵoı, – dedi shaýashylyq basshysy.
– Mine, azamat! – dep jadyrap qaldy aqsaqal bir aýyz sózine bir tonna astyq buıyrǵanyna qýanyp, – byltyr qys qatty boldy. Myna irgedegi «Qaraózek» seriktestiginiń basshysy Nartaı Ysqaqov kóktem shyǵa jurttyń jylqysy jutaýǵa jaqyndaǵanda áli ekpegen kelesi jyldyń paıyn taratty emes pe? Osyndaı el qamyn jegen erler barda jurt júdemeıdi ǵoı. Naǵyz keýsen sonda boldy.
«Ashtyqta jegen quıqanyń dámi aýyzdan ketpeıdi» degendeı, bir tonna turmaq, bir shelek jemge zárý bolyp otyrǵan elge janashyr bolǵan qandaı jaqsy. Sol ónegeni kórsetip ketken – eldegi dástúr, joralǵy. Keýsen degen bir aýyz sózdiń astarynda kátepti qara narǵa júk bolatyn qanshama maǵyna, ystyq yqylas jatyr deseńizshi.