Danalyqty bir aıaǵa syıǵyzý beker. Ol ár bette, ár qubylysta, ár zamanda ózinshe qylań beredi. Saǵdıdiń tilimen aıtsaq, «aqyldy adamǵa japyraq ta ustaz».
On úsh balanyń kenjesi Mıgel Rýıs Meksıkanyń kóne aýylyndaǵy tóltek dástúrin ustaǵan emshiniń otbasynda dúnıege keledi. Aıta keteıik, bul tóltek – kóne úndis jurtynan shyqqan ıýto-astektiń bir jurnaǵy. Keıinnen kólik apatyna ushyrap, ajal aýzynan aman qalǵan ol jaratylys týraly oıdyń tuńǵıyǵyna batyp, aqıqatty izdeıdi. Anasynyń kómegimen ejelgi babalar saltyna túsip, tóltekter danalyǵy arqyly fızıkalyq ǵalam men aqyl-oıdyń vırtýal álemin tereń túsinýge zeıin qoıady.
Áńgimemizge arqaý bolmaǵy, Mıgel Rýıstiń «Tórt kelisim» kitabynyń bir parasy. Naqtyraq aıtsaq, ekinshi kelisim – «Eshteńeni ózińizge qatysty dep qabyldamańyz» bólimi. Talapty erdiń aqylyna salmaq salar bul taraýda rýhanı ustaz eleýli ustyndy tarqatady. «О́zge jurt ne istese de, ne aıtsa da, ne oılap, ne sezinse de, ony ózińizge qatysty dep qabyldamańyz. Eger sizge keremet jan ekensiz dese, ony siz úshin aıtpaǵany. Tipti bireý qarýyn kezenip, basyńyzdan atyp jiberse de, onyń sizge esh qatysy joq». Iаǵnı aınaladaǵy árbir adam ózinshe nurly, ózinshe dertti. Eger sizge kúlse, óz áleminiń sáýlesinen habar bergeni, eger jylasa, óz ishindegi úderisti jetkizgeni. Eger sizdi tildese, ol da sizge qatysty emes degendi aıtady tóltekterdiń urpaǵy. «Qaıda barsańyz da, jalǵan aıtatyn adam tabylady, sony tereńirek túsingen saıyn siz de ózińizge jalǵan aıtyp júrgenińizdi baıqaısyz. Jurttan shyndyqty aıtady dep kútpeńiz, óıtkeni olar eń aldymen ózine jalǵan aıtady. Siz ózińizge senýińiz kerek, al estigenińizge sený-senbeý óz erkińizde. Basqa adamdardy qandaı bolsa, sol qalpynda kórip, ózimizge esh qatysy joq dep qabyldasaq, olar bizge sózimen de, isimen de zııanyn tıgize almaıdy» deıdi kitapta.
Tóltekter danalyǵynyń bilgiri, ekinshi kelisim arqyly árkimdi óz ómirin súrýge úndeıdi. Rasynda, adamda ózine qatysy joqty qabyldamaıtyn ádet qalyptassa, kóptegen jaǵymsyz jaǵdaılardan qutylary daýsyz.