Quzar jartasqa órmeleı umtylǵan qoldyń salasyndaı aq qaıyńdar jalqyn sary boıaý jaǵyp alypty. Bajaılap qarasańyz, myń túrli boıaý kenepke salǵan minsiz sýretteı jaınap tur. Býrabaıdyń baýraıy kúzgi shapanyn aıqara jamylypty. Demalys kúni bolǵandyqtan ba eken, Abylaıhan alańynda demalyp júrgen jurt jyrtylyp-aıyrylady. Han taǵynyń qarsy alańynda shoǵyrlanǵan adamdar. Áldeneni qyzyqtap tur. Biz de jettik. Qolyna zildeı aldaspan, aýmaǵy ájeptáýir qalqan ustaǵan jas jigit ponıǵa minbek. Tańǵy tymyq aýany qaq aıyryp eleýreı ún qatady.
– Qazir sýretke túsemin de, О́skemendegi qaıyn jurtyma salyp jiberemin, – dep qoıady.
О́zi qala balasy bolýy kerek, turqy ýyzǵa jarymaǵan jetim toqtydaı ponıdyń qamshylar jaǵynan minbek. Jaz boıy talaıdyń taqymy tıip, erqashty boldy ma eken, ergejeıli jylqy balyqtaı bultyńdap, jigittiń ıkemine kóner emes. Sútpisirimeı ýaqyt áýre boldy. О́ziniń de jan teri shyqty. Álden ýaqytta taıap kelgen qyzyl shyraıly, kespeldek deneli aqsaqal atqa minip kórmegen áljýazdy tyımaq bolyp til qatqan.
– Áı, balam, – dedi ol, – qolyńdaǵy qylyshyń men qalqanyńdy tasta, saýytyńdy shesh. Kórgen elden uıat-taǵy. Zamanynda jarty álemdi titirentken Alash balasy mynandaı jermen jeksen bolyp turǵan maqulyqqa minbegen. Tulpar minip, tý ustaǵan jaýjúrek uldyń keskini de sendeı emes edi.
Júıeli sóz júıesin tapty-aý deımin, álgi jigit qaýmalaǵan eldiń qushaǵynan sytylyp shyǵa bergen. Uzaı berip, shaqpa tastardyń qos qaptalyndaǵy maltapqyshtardy kórdik. Kádimgi búrkitterdi sýretke túsý úshin jalǵa beredi eken. Túlki tymaǵyńdy kıip, oqaly shapan kıip, qolyńa búrkit qondyrsań, jarasyp-aq qalatyn sııaqty. Kóne zamannyń qolamtasy kókiregińdi qyzdyratyn shyǵar, biraq qyran búrkittiń syqpyty múldem unamaǵany. Bir ǵajaby, búrkitin jalǵa beretinderdiń deni ózge ult ókilderi. Áldekimderdiń uıpalaqtap, julmalaǵanynan ba eken, qııandaǵyny qyryp túsiretin qyran minezinen pyshaq keskendeı aıyrylypty. Quddy, qolda ósken úı taýyǵy ispetti.
Uzaı berip, arqyraǵan arǵymaq emes, qol basyndaı ponıǵa aıaq arta almaǵan jigit esimizge túskeni. Ún-jyrǵasyn jyqsa, jerdegi adam túgili, kóktegi qyran da taýy shaǵylyp, pushaıman bolady eken-aý.