Ejelden án-jyrdyń altyn besigi atanǵan Kókshetaýda arqaly aıtysker aqyn Qudaıberli Myrzabektiń shyraıly shyǵarmashylyq keshi ótti. Keshke oblys ákimi Marat Ahmetjanov, Parlament Májilisiniń depýtattary, sóz qadirin biletin zııaly qaýym qatysty.
Aldymen aqynnyń qazaq rýhanııatyna qosqan mol eńbegi jan-jaqty saralanyp kórsetildi. Sh.Qusaıynov atyndaǵy Aqmola oblystyq qazaq mýzykalyq-drama teatrynyń ujymy azamattyń tabıǵı talantyn tolaıym qamtyǵan lırıkalyq kompozısııany tyńdarman qaýym nazaryna usyndy. Jas aqyn Nurǵısa Eleshuly aǵasyna arnaý joldap, jyrdan shashý shashty.
– Bıyl Qazaqstannyń halyq aqyny Kóken Shákeevtiń týǵanyna 100 jyl tolyp otyr. Aıtýly aqynnyń shákirti Qudaıberli Raqymbekuly da alpystyń asqaryna shyqty, – dedi oblys ákimi Marat Ahmetjanov, – ustaz ben shákirttiń bir-birine jalǵasa kelgen toıy rýhanı jan dúnıemizdi kemeldendirýde.
Shyǵarmashylyq keshte aqynnyń sózine jazylǵan «Baıanaýyl kóktemi», «Aıtys» ánderimen qatar, sózin de, ánin de ózi jazǵan «Ashyly-Jekeboıaq», «Ákeni ańsaý», «Qyzyl alma» ánderi shyrqaldy.
Keshke arnaıy shaqyrylǵan, aqyndardyń kóshin bastaǵan jyrshy-termeshilerdiń halyqaralyq odaǵynyń basqarma tóraǵasy, aqyn Júrsin Erman, Qazaqstan Respýblıkasy Parlamenti Májilisiniń depýtattary, belgili jýrnalıst-aqyn Janarbek Áshimjanov, tanymal aıtys aqyny Amanjol Áltaev, belgili aqyn Qorǵanbek Amanjoldar toı ıesin quttyqtap, jalyndaǵan jyrlaryn oqyp, qoshemet kórsetti.
Kesh kórigin qyzdyrǵan – aıtysker aqyn Muhtar Nııazov pen aqmolalyq aqyn Erlan Dáýlettiń sóz qaǵystyrýy boldy. Kópshilik qos aqynnyń taýyp aıtqan tamasha sózderine qaıta-qaıta qol soǵyp, rızashylyq sezimderin bildirip otyrdy. Kóksheniń baýraıyndaǵy toıǵa Jetisýdan alyp-ushyp jetken Aıtaqyn Bulǵaqov pen Shyǵys Qazaqstan oblysynan jetken Serik Qusanbaevtyń aıtysy kópshilikti tánti etti.
Taıaýda ǵana Kókshetaý qalalyq máslıhatynyń sheshimimen Qudaıberli Myrzabekke Kókshetaý qalasynyń qurmetti azamaty ataǵy berilgeni de jurtshylyqqa málim boldy. Aqynyn ardaqtaǵan eldiń eńsesi qashan da bıik.
Kókshetaý