Bul kúnderi barsha qazaq jankúıerleri 19 qazanda AQSh-tyń Las-Vegas qalasynda ótetin UFC Fight Night 245 týrnırin taǵatsyzdana kútip otyr. Sol keshte asa jeńil salmaqtaǵy Asý Almabaev Brazılııa sportshysy Mateýs Nıkolaýmen kúsh synasady.
30 jastaǵy Asýdyń álemdegi eń beldi promoýshende óner kórsetip júrgenine bir jyldan endi ǵana asty. Soǵan qaramastan Jambyl oblysynyń týmasy óziniń óreli ónerimen jankúıerler júregin jaýlady. 2023 jyldyń 5 tamyzynda ol ıamaıkalyq Odı Osborndy qylǵyndyryp tastasa, bıyl AQSh-tyń qos apaıtósi – Sı-Djeı Veıgara men Hose Djonsondy jeńdi. Bul básekelerde tóreshilerdiń barlyǵy da Almabaevtyń myqtylyǵyn biraýyzdan moıyndady. Osy jeńisteriniń arqasynda qandasymyz UFC reıtınginde 14 orynǵa kóterildi. Al sanaýly kúnderden keıin ol óziniń alǵashqy reıtıngtik jekpe-jegin ótkizedi. Eger Asý osy qarsylasyn utsa, onda qazaq faıterin TOP-10-dyqtyń qatarynan kórip qalýymyz ábden múmkin.
Mateýs Nıkolaýdyń jasy 31-de. Brazılııanyń Mınas-Jeraıs aımaǵynda dúnıege kelgen ol 2010 jyldan beri aralas jekpe-jekpen aınalysady. Sol aralyqta 27 ret oktagonǵa shyǵyp, 21 qarsylasyn qapy qaldyrdy. О́z básekeleriniń teń jartysynan astamyn «Zulpyqar» (Asýdyń janama esimi – red.) merziminen buryn aıaqtady. Bes ret utylyp, taǵy bir aıqasta teń nátıje tirkeldi. Matteýstiń UFC-de kúsh synasyp júrgenine 10 jylǵa jýyqtady. Alǵashynda ol irikteý týrnırinen irkilmeı ótti. Promoýshenniń negizgi jarysyndaǵy tusaýkeser kezdesýin brazılııalyq 2015 jyldyń 7 qarashasynda Brýno Koreıraǵa qarsy ótkizip, óz otandasyn «japon galstýgi» dep atalatyn ádiske salyp, «uıyqtatyp» tastady. Odan keıin Djon Maraga, Lýıs Smolka, Aldan dos Santos, Felıpe Efreın, Manel Kape, Tım Elıot, Davıd Dvorak, Mett Shmeldi utty. Biraq Datsın Ortız, Brendon Roıval, Aleks Perez syndy sańlaqtarǵa Matteýstiń áli jetpedi.
Qalaı desek te, Nıkolaýdyń óte qaýipti qarsylas ekenin moıyndaýǵa tıispiz. Ol uryp ta qulata alady, sabmıshn ádisterin de sátti qoldana biledi. Iá, brazılııalyqtyń sońǵy eki jekpe-jeginde oısyraı utylǵany ras. Eki retinde de nokaýtqa tústi. Desek te, Matteýstiń mol tájirıbesi baryn da esten shyǵarmaıyq. Ol sheginýdi bilmeıtin júrekti jigit, tehnıkalyq arsenaly da mol. Grepplıngi óte jaqsy, soqqylary da joıqyn. UFC reıtınginde Ońtústik Amerıkanyń oǵylany qazaq faıterinen baqandaı jeti saty joǵary tur. Sondyqtan da Asý Almabaevqa aldaǵy jarysqa saqadaı saı daıyndyqpen kelý kerek.