Gete: «Tabıǵat – ár paraǵy uly jańalyqqa toly jalǵyz kitap» degen-tin. Shynynda, tabıǵat zańy qashan da aqıqat jaǵynda, ol adasýdy, qatelesýdi bilmeıdi. Ony qorǵaǵan, qorǵaýǵa tyrysqan jan ıesiniń orny dańq tórinde, abzaldyq bıiginde.
Sonaý tym ári de emes, Amerıka atty alyp qurlyqta ertegige uqsas oqıǵa bolypty. Estigender kózge jas irkipti, kórgender qarshadaı qyzdyń qaısarlyǵyna qol soǵypty. Álqıssa, 1997 jyly Djýlııa Hıll atty jas arý tosyn sheshimge bas burady. Árirekten sabaqtasaq, ómirge qushtar boıjetken birde aýyr jaǵdaıǵa tap bolyp, qaterli jol-kólik apatyna ushyraıdy. Kóp uzamaı densaýlyǵy qalypqa kelgen qyzyn ata-anasy ormanǵa, shoq toǵaı arasyna aparyp psıhologııalyq, fızıkalyq jaǵynan saýyǵýyn qadaǵalaıdy. Osylaısha, bala kúninen-aq tabıǵat qudiretin sezingen Djýlııanyń sanasy ózgerip, qorshaǵan ortaǵa degen tereń súıispenshiligi oıanady. Ári qońyrsalqyn orman tynysy densaýlyǵyna oń áser etip, qulantaza aıyǵýyna sep bolady. Osy shaqta boıjetkenniń keýdesine tabıǵat ananyń aıaly alaqany óz anasyndaı sezilip, ony qorǵaýdy ózine basty murat, bıik ustanymy etedi.
1997 jyly áldebir amerıkalyq mekeme keń aýmaqty orman shebin qaramaǵyna alyp, ondaǵy záýlim aǵashtardardy kesýge qamdanady. Bul aýmaq – júzjyldyq alyp qaraǵaılarǵa qalqan bolǵan, japyraǵy jaıqalyp, butasy bultqa jetken jumaq meken edi. Aqkerbez tabıǵattyń erekshe perzentiniń biri – 500 jyl ómir súrgen, boıy 60 metrden asatyn «Aı» esimdi aǵash bolatyn. 23 jastaǵy Djýlııa qasaqana qoldyń uryn kele jatqanyn ańdap, osy bir alyp aǵashty qorǵamaqqa bel býady, «Aıdyń» quzar shyńyna órmelep, tómen túsýden bas tartady. Qarsylyq qaǵıdasy baqandaı 738 kún tabandy Djýlııa «Aıdy» kúzetip ushar basynda otyrady. Eki jylǵa jýyq ýaqyt butadan toqylǵan 50 metr bıiktiktegi shaǵyn úıshikte ómir súrgen ol kópshiliktiń qyzyǵýshylyǵyn týdyra bastaıdy. Qaısar qyzdy qoldaýshylar toby jasaqtalyp, boıjetkendi azyq-túlikpen, jyly kórpe-jastyqpen, baılanys quraldarymen qamtamasyz etedi. Maqsatqa jeter jol qaı kezde de ońaı bolmasy ekibastan anyq, Djýlııa qıyndyq ótinde qar tósenip, muz shaınaıdy. Buzyp-jarǵysh daýyldar, tózgisiz sýyq, tópelegen nóserler legi onyń úıshigine zalal keltirip, azyq-túlik tapshylyǵyna ushyratady. Sonda da alǵan betinen qaıtpaǵan arýdyń temirdeı tabandylyǵyAmerıka jurtynyń aqyl-oıyn aıran-asyr etip, buqaralyq aqparat quraldary, tanymal jýrnalıster, shoýmender men ártister legi arnaıy kelip, qaısar qyzdyń qolyn alyp, fotoǵa túsedi. Adam sengisiz tanymaldylyqqa ıe bolǵan Djýlııa sońynan halyq ergen alyp kúshke aınalady. Endigi jerde ormandy jaıpaýǵa nıetti amerıkalyq mekeme onymen sanasyp, talap-tilekterin oryndaýǵa májbúr bolady. Aqyry «Aı» men onyń mańaıyndaǵy 60 metrlik aǵashtardy saqtaý týraly sheshim qabyldanyp, tabıǵat bólshegi otalýdan aman qalady.
Mine, tabandylyq, mine, nátıje, aıdarly tilek. Keıinnen jýrnalısterge bergen suhbatynda Djýlııa «Aı» aǵashymen týǵan baýyrdaı bolyp ketkenin, onyń talaı mehnatty kezeńderde ómirine arasha túskenin jetkizedi. Ondaǵy ár buta men sansyz jándiktermen dostasyp úlgergen boıjetken keler urpaqtyń uranyna aınalady. Búginde Tabıǵat- anany qorǵaýǵa attanǵan jastar Djýlııanyń eren erligine soqpaı ótpeıdi, atyn adaqtamaı artyq baspaıdy desedi.
Tabıǵat – qamqor ana, tabıǵat – ózindeı san qubylysty jaratýshy. Djýlııanyń joǵarǵy erligi buljymas uǵymdy taǵy bir dáleldeı túskendeı.