Shyǵys Qazaqstan oblysynda Orta Azııada teńdesi joq kópir qurylysy aıaqtalyp, halyq ıgiligine saltanatty túrde tapsyrylǵanyna el bolyp qýanyp jatyrmyz.
Erterekte, bala kezimizde ákelerimizdiń «jaz jaılaýda Balyqshydan О́skemen, Semeıge jol tartqanda (balyq jetkizý) Ertis ózeninen salmen ótetin edik. Jel soqsa, sal ózendi kesip ótýge jaramaı, turalap qalatynbyz. Qarly, borandy qysta janymyzdy shúberekke túıip, at shanamen muz ústinen ótetin edik» degenin talaı estip óstik. Arǵy jaǵa men bergi jaǵanyń arasy 6 shaqyrym bolatyn ótkelge parom túsip, kólikterdi tasymaldap júrgeniniń ózine 50 jyldan astam ýaqyt ótipti. Paromǵa úlgermeı, syımaı qalatyn sátterdegi saryla kútýdiń ózi bir tóbe áńgime-estelik.
Qystyń borandy, kóktemniń jylymyq kúnderinde muz jarylyp, ústimen ótip bara jatyp, qyzyl sý jınalǵan jerdiń juqaltań jerinde sýǵa ketken qanshama jerlesterimiz, kólik quraldary boldy. Almatydan aýylymyzǵa kelgende taıaq tastam jerdegi úıimizge jete almaı, at shanaǵa jarmasyp, jaıaý Ertisten ótken kezderimiz jadymyzda.
Osy ǵasyr qurylysynyń basy-qasynda júrip, bólingen qarajatty shashaý shyǵarmaı, eren eńbek sińirgen barlyq azamatqa alǵysymyz sheksiz. Ásirese, eldiń tilek-armanyn estip, osynaý ıgilikti iske uıytqy bolǵan Memleket basshysy Qasym-Jomart Toqaevqa rızalyǵymyzdy jetkizemiz.
Ashat Sálıev,
ınjener-qurylysshy
Astana