Buqtyrma sý qoımasynyń ústin qaq jaryp ótetin kópirdiń qoldanýǵa berilgenin estip, qýanyshtan kózimizge eriksiz jas keldi.
Olaı deıtinim, talaı jyl boıy, tipti ǵasyr desek te artyq emes, Aq Ertis bólip turǵan eki eldiń arasyn jalǵaıtyn kópir bolmaı, salmen ótip, adam men malymyzdyń shyǵynǵa ushyraǵany belgili. Tipti alysqa barmaı-aq, keshe ǵana ózimiz de qyzyl sýdy qyzyl asyqtan keship óttik, qansha júk tıegen mashınanyń, qansha jerlesterimizdiń kóz aldymyzda sýǵa ketkeniniń kýási boldyq. Jergilikti jurttyń janaıqaıy el basqarǵan azamattardyń qulaǵyna jetkenine qýanyshtymyz. Qýanysh uzaǵynan súıindirsin!
Kópir salynǵan jer el aýzynda «Baraq ótkel» atanyp ketken edi. Sý tasymaı turǵanda bul jerde Qamysty degen aýyl bolǵan. Ol jerge Aq Ertis arqyly kelgen júk parohodtary toqtaıtyn. О́lketanýshy retinde bul jerge talaı kelip, kónekóz qarııalardan tarıhyn jazyp alǵanmyn. Kezinde atalǵan kópirdi «Baraq ótkel» ataıyq degen usynys aıtyp, baspasózde birneshe ret maqala jazyp edim, sol tarıhı ataýdy jańǵyrtsaq deımin. Osy kópirden ótken adamdar óz tarıhyn bilip, aman-esen ótýin tilep, atalarymyz aıtyp ketken «esińe saqta ótkendi, júrýiń úshin jyǵylmaı» degendi jadynda saqtasa quba-qup bolar edi.
Shekerbaný RAHMETOLDAQYZY,
ólketanýshy
Almaty