Abyqan Amanbaıuly áke jolyn qýǵan azamattardyń biri bolyp qalyptasty. Ol elimiz ekonomıkasynyń damýyna súbeli úles qosty. Almaty mal dárigerlik ınstıtýtyn qyzyl dıplommen bitirgen soń, eńbek jolyn Shelek aýdany, Masaq aýylynda mal dárigerlikten bastady. Eren eńbegimen erte tanylǵan Abyqanǵa oblysta jańadan ashylǵan sharýashylyqqa basshy bolý usynylady. Jas jigit muny ózine degen qurmet dep túsindi.
Abyqan Amanbaıulynyń uzaq jylǵy eńbegi Túrgen aýylyn kórkeıtýge arnaldy. Ol ekonomıkalyq máselelermen birge, aýyldaǵy etnosaralyq kelisim men tatýlyqtyń shaıqalmaýyna sergek qarady. О́ıtkeni, oblysta qansha ult pen ulys bolsa, Túrgende de solardyń sonshama ókilderi turady. Sondyqtan eshkimdi alalamaı, barlyq etnostyń teńdigin, tatýlyǵyn jarastyrý joldaryn izdedi, olardyń mádenıetin, salt-dástúrin damytýdy oılastyrdy. Sol úrdis keıin de, búgin de óz nátıjesin kórsetip keledi.
Abyqan aǵanyń ómir jolyna zer salatyn bolsaq, ol aýyl sharýashylyǵyn damytýmen birge, aýdanda, aýylda bilim salasyn damytýǵa da ózindik qoltańbasyn qaldyrdy. Onyń eńbegi Úkimet tarapynan da, halyq tarapynan da atalyp ótildi. «Qurmet Belgisi» ordenimen, birneshe medalmen nagradtaldy. Abyqan Jeksenbekov – Túrgen aýylynyń qurmetti azamaty. О́miriniń sońǵy jyldary kıeli Túrgen aýylynyń ákimi qyzmetin atqardy.
Ol egemendiktiń alǵashqy jyldary qazaq tili mártebesin kóterýge, qazaq mektepterin ashýǵa belsene atsalysty. Túrgende orys tilinde eki mektep bar edi. Qazaq mektebi bolmaǵan. Aýyldyń tarıhynda munda qazaq mektebi bolmaǵan eken. Osyǵan belsene aralasty. Sóıtip, Túrgendegi Ilıch atyndaǵy mekteptiń atyn ózgertip, ony memleket jáne qoǵam qaıratkeri Dinmuhamed Qonaevtyń esimin berýdi qolǵa aldy. Sonyń arqasynda mektep te, kóshe de D.Qonaevtyń atyn ıemdendi.
Bilim berý isiniń damýyna qosqan úlesi úshin ol «Qazaqstan Respýblıkasy bilim berý isiniń ozat qyzmetkeri» tósbelgisimen marapattaldy. Onyń boıynda adamǵa degen jaqsylyq, súıispenshilik, óz múddesinen buryn halyq isin birinshi kezekke qoıatyn naǵyz azamattyǵy, týǵan eli men jerine degen súıispenshilik sezimderi joǵary boldy.
Abyqan Amanbaıulynyń esimi urpaq jadynda máńgi saqtalady. О́zi ashqan, qazaqtyń qara kózderin bilimmen sýsyndatýdy maqsat etken Túrgen orta mektebinde jyl saıyn Abyqan Jeksenbekovke arnalǵan arnaıy sharalar ótkizilip otyrady. Sol sharalardy uıymdastyratyn ári oǵan qoldaý kórsetetinder Abyqan aǵa áýleti. Aǵanyń ul-qyzdary mektepke qajetti jabdyqtarmen, kompıýterlik qurylǵylarmen, aqparattyq quraldarmen, ınteraktıvti taqtalarmen, t.b. qamtamasyz etip otyr. Jyl basyndaǵy Túrgen qazaq orta mektebinde Abyqan Jeksenbekovke arnalǵan oqý jáne sporttyq jarystar ótkiziledi. Onda mektep oqýshylary Abyqan aǵanyń ómir jolymen, eńbek jolymen tanysady.
Aýyldastary ony «Abyqan – muzjarǵysh keme, óıtkeni, ol qandaı iste bolsyn topty bastap basynda ózi júredi» deıdi. Túrgen aýylyn kórkeıtýge, halqynyń turmys-tirshiligin jaqsartýǵa búkil ǵumyryn arnaǵan Abyqan Jeksenbekovtiń ıgilikti isterin búginde árkim aıtyp júr.
Álısultan QULANBAI,
«Egemen Qazaqstan».
Almaty oblysy,
Eńbekshiqazaq aýdany.